«Ցանկացել է պատուհանից մտնել տուն, մալուխը պոկվել է ու ցած է ընկել». հարևանուհին մանրամասներ է պատմում

ԵՐԵՎԱՆ, 26 հունվարի. /Նովոստի–Արմենիա/. Արաբկիրի Երզնկյան փողոցի թիվ 1 շենքի բնակիչները մանրամասներ են պատմել այսօր շենքի 12-րդ հարկից տղամարդու ընկնելու միջադեպի վերաբերյալ, հաղորդում է tert.am–ը։

Հարևանների խոսքերով, գիշերը 04։00-04։30-ին անջատվել է շենքի ինտերնետն ու կաբելային հեռարձակումը:

«Հարևանուհիս գնացել է արտերկիր աղջիկների մոտ, և այդ տղամարդը, թերևս, փորձել է պատուհանից մտնել նրա տուն՝ գողություն անելու նպատակով: Գողը կախվել է ինտերնետի և վերելակի մալուխից, մալուխը պոկվել է, և նա ընկել է ցած: Առավոտյան եկան ոստիկանները և ասացին՝ ձեր հարկից մարդ է ընկել, ես էլ զարմացա, պատկերացրեցի, որ դա գող կարող է լինել», – նշել է շենքի բնակիչներից մեկը։

Նրա խոսքով, պարզվել է, որ նա ցանկացել է մտնել արտերկիր մեկնած կնոջ տուն , սակայն չի կարողացել դուռը բացել լոմով, որոշել է դրսի պատուհանից մտնել:

«Մալուխներից կախվելով՝ բացել է պատուհանը, հանել ցանցը, բայց մալուխը պոկվել է, և նա 12-րդ հարկից ընկել է», – պատմել է հարևանուհին:

Տղամարդն ընկել է 12–րդ հարկից Երևանում. դին անճանաչելի է>>
 
Ըստ նրա՝ ոստիկանները դիմել են տանտիրոջ բարեկամին, ով բացել է դուռը, և պարզվել է, որ պատուհանը բացված է, բայց ոչ մի բան չեն տարել տանից:

«Առավոտյան տղաս աշխատանքի գնալուց տեսել է, որ տղամարդն ընկած է աղբի կողքը»,- նշել է հարևանուհին:

ՀՀ քննչական կոմիտեի մամուլի ծառայության հաղորդմամբ, տղամարդը ցանկացել է մտնել իր բարեկամին պատկանող՝ նշված շենքում գտնվող բնակարան:

Զննությամբ տղամարդու հագուստի գրպանում հայտնաբերվել է կտորից մեկ զույգ ձեռնոց, կրակայրիչ և փոքր լուսատու սարք, իսկ դիակի մոտ՝ պտուտակահան և ծխախոտի տուփ:

Երզնկյան 1 շենքի 12-րդ հարկում՝ աստիճանավանդակի մոտ, հայտնաբերվել է նույն շենքի 45-րդ բնակարանի ննջասենյակի պատուհանի մաս կազմող ցանցը, ինչպես նաև պարզվել է, որ պատուհանի դրսի պատուհանագոգի մի մասի ձյան ծածկույթը բացակայում է: Երզնկյան 1 շենքի 12-րդ հարկի բաց պատշգամբի՝ շենքի դրսի պատի հատվածում հայտնաբերվել են մարզական կոշիկների հետքերին նմանվող հետքեր:

ՀՀ քննչական կոմիտեի Երևանի քննչական վարչության Արաբկիր վարչական շրջանի քննչական բաժնում քննություն է տարվում պարզելու տղամարդու ինքնութունը, մահվան հանգամանքները, նշանակվել է դատաբժշկական փորձաքննություն:–0–