Ընտրողների մասնակցությունն ԱԺ ընտրություններին ժամը 17:00-ի դրությամբ կազմել է 50,93% . ԿԸՀ (ԼՐԱՑՎԱԾ)

ԵՐԵՎԱՆ, 2 ապրիլի. /Նովոստի-Արմենիա/. Հայաստանի Ազգային ժողովի ընտրություններում ժամը 17:00-ի դրությամբ քվեարկել է 1 317 936 ընտրող կամ ընդհանուր ընտրազանգվածի 50,93 տոկոսը, հայտնեց ԿԸՀ քարտուղար Արմեն  Սմբատյանը:

Ապրիլի 2–ին Հայաստանում անցկացվում են խորհրդարանական ընտրություններ։ Երկրի պատմության մեջ առաջին անգամ քվեարկությունն անցնում է 100 տոկոսանոց համամասնական համակարգով։ Ժամը 08։00–ից երկրի ողջ տարածքում բացվել են 2009 ընտրատեղամասերը, քվեարկությունը կավարտվի ժամը 20։00–ին։

«Երևանի չորս ընտրատարածքներում քվեարկել է՝ առաջինում՝ ընտրողների 50,8 տոկոսը (101 718), երկրորդում՝ 49,61 տոկոսը (105 440), երրորդում՝ 49,26 տոկոսը (110 506) և չորրորդում՝ 46,61 տոկոսը (97 296)», – ասաց Սմբատյանը լրագրողներին։

ԿԸՀ տվյալներով, Արարատի մարզում քվեարկել է ընտրողների 57,14% (126 567), Արմավիրի մարզում՝ 47,37% (109 902), Արագածոտնի մարզում՝ 57,1% (66 797), Գեղարքունիքի մարզում՝ 56,42% (108 144), Լոռիում՝ 49,22% (117 290), Կոտայքի մարզում՝ 49,58% (118 212), Շիրակի մարզում՝ 46,47% (107 872), Վայոց Ձորում և Սյունիքում՝ 54,86% (89 119) և Տավուշի մարզում՝ 53,69% (59 073).

2017 թ.–ի ապրիլի 1–ի դրությամբ Ընտրողների ռեգիստրում, ՀՀ ոստիկանության տվյալներով, ներառված է 2 587 706 մարդ։

Կիրակի հանրապետությունում մեկնարկել են վեցերորդ գումարման խորհրդարանի ընտրությունները, որոնց մասնակցում է հինգ կուսակցություն և չորս դաշինք։ Այս ընտրություններն ուշագրավ են նրանով, որ երկրի պատմության մեջ առաջին անգամ քվեարկությունը տեղի է ունենում 100 տոկոսանոց համամասնական համակարգով: Այս ընտրություններն առաջին համապետական ընտրություններն են 2015 թ.-ի սահմանադրական փոփոխություններից հետո, որոնք նախատեսում են անցում խորհրդարանական իշխանավարման գործող նախագահի լիազորությունների ժամկետի ավարտից հետո` 2018 թ.–ին։–0–