ՍԱՊԾ-ն հայկական սուպերմարկետներից մեկում ռուսական յոգուրտների մակնշման անհամապատասխանություններ է հայտնաբերել

ԵՐԵՎԱՆ, 7 հոկտեմբերի. / Նովոստի-Արմենիա/. ՀՀ ԳՆ սննդամթերքի անվտանգության պետական ծառայությունը, շուկայահանված յոգուրտի մակնշման և պահման պայմանների համապատասխանությունը պարզելու նպատակով, Նոր Նորքի 5-րդ զանգվածում գործող «Էվրիկա» սուպերմարկետում իրականացրել է ռուսական արտադրության «Ռոստիշկա» ապրանքանիշի յոգուրտի դիտարկում, հաղորդում է գերատեսչության մամուլի ծառայությությունը:

Դիտարկումն իրականացվել է Սննդամթերքի անվտանգության պետական ծառայության պետի հրամանով՝ հիմք ընդունելով ծառայության թեժ գծով քաղաքացու կողմից ստացված տեղեկությունը:

Դիտարկման արդյունքում հայտնաբերվել են թերի մակնշմամբ «Ռոստիշկա» ապրանքանիշի ըմպելի յոգուրտներ՝ ելակի և խնձորի համով, ինչպես նաև խնձորի համով յոգուրտ: Մասնավորապես, յոգուրտների հայերեն մակնշումը չի համապատասխանել բնօրինակին, նաև՝ փակցված է եղել բնօրինակի վրա:

Վերոնշյալ ապրանքատեսակների վաճառքը կասեցվել է:

Հիմք ընդունելով դիտարկման արդյունքները, ինչպես նաև սննդի շղթայում հետագծելիության ապահովման նպատակով՝ պետական վերահսկողության միջոցառումներ են իրականացվել նաև ներմուծող ընկերությունում: Արդյունքում հայտնաբերվել են թերի մակնշմամբ «Ռոստիշկա» և «Դանոն» ապրանքանիշի յոգուրտներ՝ 6256 հատ, որոնց հայերեն մակնշումը չի համապատասխանել բնօրինակ մակնշմանը: Նշված ապրանքատեսակների վաճառքը կասեցվել է, ներմուծողին հանձնարարվել է վերացնել թերությունները: -0-