ԵՐԵՎԱՆ, 11 մարտի. /Նովոստի–Արմենիա/. Գյումրիում 2015թ. հունվարի 12-ին Ավետիսյանների ընտանիքի սպանության մեջ մեղադրվող Վալերի Պերմյակովի ինքնազգացողությունն այսօր՝ մարտի 11-ին, դատարանում վատացել է:
News.am-ի թղթակիցը հաղորդում է, որ դատավոր Հարություն Մովսիսյանը 30 րոպեով ընդմիջել է դատական նիստը, սակայն ավելի ուշ վերադառնալով՝ հայտարարել, որ Պերմյակովի արյան զարկերակային ճնշումն է բարձրացել, նրան հետազոտում են, նիստը շարունակվել չի կարող:
Ապացույցների հետազոտման փուլը կշարունակվի դատական հաջորդ նիստին՝ մարտի 18-ին:
Այսօր նախատեսվում էր ռուսական ռազմաբազայի 7 նախկին աշխատակիցների հարցաքննությունը, սակայն ռուսական կողմը չի կարողացել ապահովել նրանց ներկայությունը: Այսպիսով՝ մեղադրող դատախազը դատարանին միջնորդեց փոխել ապացույցների հետազոտման կարգը եւ անցնել գործում եղած փաստաթղթերի հրապարակմանը: Միջնորդությունը բավարարվեց:
Գյումրիում 2015 թվականի հունվարի 12–ին սպանվել է յոթ մարդուց բաղկացած ընտանիք, այդ թվում` երկու մանկահասակ երեխաներ։ Հանցագործության կատարման մեջ մեղադրվում է Գյումրու 102–րդ ռուսական ռազմակայանի զինծառայող Վալերի Պերմյակովը, ով 2015 թ.–ի հունվարի 13–ին ձերբակալվել է ռուս սահմանապահների կողմից հայ–թուրքական սահմանը հատելու փորձի ժամանակ և խոստովանել է իր մեղքը։
Վալերի Պերմյակովն իրեն առաջադրված առաջին մեղադրանքով 2015 թվականի օգոստոսի 12–ին արդեն դատապարտվել է 10 տարվա ազատազրկման խիստ ռեժիմի գաղութում Հինգերորդ ռուսական կայազորային զինվորական դատարանի որոշմամբ։ Պերմյակովը մեղավոր է ճանաչվել ծառայությամբ նրան վստահված զենքի առկայությամբ դասալքության, հրազենի հափշտակման և անօրինական կրման համար։ «Սպանություն» հոդվածով գործն առանձնացվել է առանձին վարույթում և փոխանցվել հայկական կողմին։ -0-
