Փաշինյանը նախաձեռնում է խորհրդարանի արտահերթ նիստ գումարել Երևանում ստեղծված իրավիճակի կապակցությամբ

ԵՐԵՎԱՆ, 28 հուլիսի. /Նովոստի-Արմենիա/. ԱԺ ըննդիմադիր պատգամավոր Նիկոլ Փաշինյանը նախաձեռնում է խորհրդարանի արտահերթ նստաշրջան գումարել Երևանում ՊՊԾ գնդի շուրջ ստեղծված իրավիճակի կապակցությամբ։

ՊՊԾ գնդի շուրջ ստեղծված իրավիճակի հարցով ԱԺ արտահերթ նստաշրջան հրավիրելու նախաձեռնության տակ այս պահին համաձայնել են ստորագրել Թևան Պողոսյանը, Զարուհի Փոստանջյանը, Լևոն Զուրաբյանը, Խաչատուր Քոքոբելյանը, Ռուբիկ Հակոբյանը, Ալեքսանդր Արզումանյանը, Ստեփան Դեմիրճյանը, Լյուդմիլա Սարգսյան:

Անհրաժեշտ է ևս 35 պատգամավորի ստորագրություն:

Ընդդիմադիր ակտիվիստ Ժիրայր Սեֆիլյանի զինված կողմնակիցները հուլիսի 17–ին մուտք են գործել ՊՊԾ գնդի տարածք։ Ներխուժման ժամանակ զոհվել է գնդապետ Արթուր Վանոյանը։ Մարմնական վնասվածքներով հիվանդանոց է տեղափոխվել վեց մարդ` հինգ ոստիկան և զինված խմբի անդամներից մեկը։

«Եթե ունեք որևէ կոնտակտ ԱԺ որևէ պատգամավորի հետ, զանգեք նրան, գրեք, խնդրեք, պահանջեք, որ ստորագրեն այսօր ժամը 17.00-ին ԱԺ արտահերթ նստաշրջան հրավիրելու համար», - գրել է Փաշինյանը Facebook-ի իր էջում:

Նա հայտնել է, որ համապատասխան ձևաթուղթը ստորագրելու ժամկետը լրանում է 17.00-ին:

Զինված խմբի կողմից ՊՊԾ գնդի շենքը գրավելու պատճառով ստեղծված լարվածության սրումից հետո առաջին մի քանի օրվա ընթացքում Փաշինյանը հիմնական բանակցողներից էր: Նա ակտիվորեն ելույթ էր ունենում ամենօրյա ցույցերին` կոչ անելով բացառապես խաղաղ ճանապարհով պայքարել իշխանափոխության համար և նշելով արյունահեղությունից խուսափելու անհրաժեշտության մասին:

Սակայն, երբ զինված անձանցից Վարուժան Ավետիսյանը կոչ արեց Փաշինյանին «դադարել օգտագործել շարժումը իր նեղ շահերի նպատակով», պատգամավորը հայտարարեց, որ չի հավակնում ղեկավարել և համակարգել անցկացվող ակցիան:

ՊՊԾ գնդի շենքը զավթած անձինք պահանջում են ազատ արձակել Ժիրայր Սեֆիլյանին, ով կալանավորվել է շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։ -0-