Կանխատեսումներ. ով կմնա Հայաստանի կառավարության կազմում նոր վարչապետի օրոք

ԵՐԵՎԱՆ, 13 սեպտեմբերի. /Նովոստի-Արմենիա/. Հինգշաբթի ՀՀ վարչապետ Հովիկ Աբրահամյանի հրաժարականից և նրա պաշտոնին Կարեն Կարապետյանի նշանակումից հետո հայկական մամուլում ամենաքննարկվող թեմաներից մեկը, բնականաբար, կառավարության կազմում սպասվող հրաժարականներն են:

Ավելի վաղ ՀՀ նախագահ Սերժ Սարգսյանը հայտնել է երկրի կառավարության կազմում սպասվող լայնամասշտաբ փոփոխությունների մասին: Իսկ արդեն սեպտեմբերի 9-ին ընդունել է կառավարության հրաժարականը` վարչապետ Հովիկ Աբրահամյանի հրաժարականի հիամն վրա: Նախօրեին ՀՀԿ–ն, գործադիր մարմնի և ՀՀԿ Խորհրդի նիստում, հաստատեց Կարեն Կարապետյանի թեկնածությունը վարչապետի պաշտոնում:

ՀՐԱՏԱՊ. Կարեն Կարապետյանը նշանակվել է Հայաստանի նոր վարչապետ>>

Հայկական ԶԼՄ-ները տարատեսակ կանխատեսումներ են անում` կապված նրա հետ, թե նախարարներից ով կկարողանա պահպանել իր պաշտոնը:

Ինչպես նշում է «Հրապարակ» թերթը, կառավարությունում սպասողական վիճակ է. բոլորը սպասում են, թե ինչ ճակատագիր է իրենց սպասվում, բացառությամբ ՀՅԴ նախարարների, որոնք կպահպանեն իրենց պաշտոնները: Դրանք են ՀՀ էկոնոմիկայի նախարար Արծվիկ Մինասյանը, ՀՀ կրթության և գիտության նախարար Լևոն Մկրտչյանը, Տարածքային կառավարման և զարգացման նախարար Դավիթ Լոքյանը:

Պարբերականի տեղեկություններով, ոչ միայն կառավարության կազմն է մոտ 80 տոկոսով նորացվելու, այլև` ՀՀԿ-ն ամբողջությամբ «ռեսթարթ» է արվելու մինչ 2017թ.-ի խորհրդարանական ընտրությունները` բացառությամբ ՀՀԿ-ի քսակը ձևավորող անձանց։ Ընդ որում, ինչպես նշում է թերթը, Կարեն Կարապետյանին իրավունք է վերապահվել նախարարների կաբինետը կազմել իր հայեցողությամբ, և հնարավոր է, որ հանրությանը լրիվ անծանոթ մարդիկ ժամանեն դրսից, այսպես կոչված լավ մենեջերներ, որոնց Կարապետյանն անձամբ ճանաչում և վստահում է:

Միաժամանակ, «Չորրորդ իշխանություն» թերթը, հղում անելով իր աղբյուրներին, նշում է, որ հաջորդ կառավարության կազմում իրենց պաշտոնը պահպանելու են ՀՀ կառավարության աշխատակազմի ղեկավար–նախարար Դավիթ Հարությունյանը, Էներգետիկայի և բնական պաշարների նախարար Լևոն Յոլյանը, ՀՀ արդարադատության նախարար Արփինե Հովհաննիսյանը»։

Իսկ «Հայկական ժամանակ» թերթը, հղում անելով քաղաքական կուլիսների խոսակցություններին, նշում է, որ արդարադատության նախարար Արփինե Հովհաննիսյանը առաջիկայում չի վերանշանակվի։ Արփինե Հովհաննիսյանի փոխարեն, ինչպես քննարկվում է քաղաքական կուլիսներում, արդարադատության նախարար կարող է նշանակվել սահմանադրագետ Վարդան Պողոսյանը, ով, սակայն, առայժմ իր համաձայնությունը չի տալիս դրա համար։ Ընդ որում, երկուսն էլ դեռևս չեն մեկնաբանում տվյալ լուրերը:

Ավելի վաղ ռուսական «Ինտերֆաքս» գործակալությունն էլ, հղում անելով Հայաստանի կառավարության իր աղբյուրներին, հայտնել է, որ ՀՀ պաշտպանության նախարար Սեյրան Օհանյանը, հավանաբար, կնշանակվի ՀԱՊԿ գլխավոր քարտուղար: Միաժամանակ, Պաշտպանության նախարարի թեկնածուների շարքում, շրջանառվում է Արցախի հերոս, գեներալ Վիտալի Բալասանյանի անունը: -0-