Հայաստանի գլխավոր սեյսմոլոգը կոչ է արել չանհանգստանալ երկրում գրանցված 17 երկրաշարժերի պատճառով

ԵՐԵՎԱՆ, 4 մարտի. /Նովոստի–Արմենիա/. ՀՀ ԱԻՆ Սեյսմիկ պաշտպանության ազգային ծառայության ղեկավար ղեկավար Հրաչյա Պետրոսյանը կոչ է արել չանհանգստանալ այսօր Հայաստանում գրանցված 17 երկրաշարժերի պատճառով։

Ուրբաթ` մարտի 4-ին, ժամը 14.09-ին ՍՊԾ -ից տեղեկատվություն է ստացվել, որ տեղական ժամանակով ժամը 11.03-ից մինչև ժամը 13.24-ը (Գրինվիչի ժամանակով` ժամը 07.03-ից մինչև ժամը 09.24-ը) ՀՀ ԱԻՆ Սեյսմիկ պաշտպանության ծառայության սեյսմոլոգիական ցանցի կողմից գրանցվել է 0,5-ից 1,4 մագնիտուդ ուժգնությամբ 17 երկրաշարժ։ Երկրաշարժերը գրանցվել են Գավառ քաղաքից 16 կմ դեպի հարավ-արևմուտք, դրանց օջախը գտնվել է 10 կմ խորության տակ։

Ստորգետնյա ցնցման ուժգնությունը էպիկենտրոնում կազմել է 1-2 բալ։

«Հայաստանի տարածքում տարբեր տարիների իրար հետևից գրանցվել է 10–12 երկրաշարժ, այնպես որ սա արտառոց դեպք չէ, և անհանգստանալու առիթ չկա», – ասաց Պետրոսյանը «Նովոստի–Արմենիա» գործակալությանը։

Նա նշեց, որ ծառայությունն օպերատիվ ռեժիմով շուրջօրյա մոնիտորինգ է իրականացնում։

«Մենք հետևում ենք սեյսմիկ իրավիճակին։ Եթե կարևոր և հետաքրքիր երևույթ հայտնաբերենք, ապա կտեղեկացնենք հանրությանը, ինչպես արեցինք այս 17 երկրաշարժերի պարագայում», – ավելացրեց Պետրոսյանը։

Նրա խոսքով` ցնցումները եղել են թույլ, և բնակիչները դրանք չեն զգացել։

Պետրոսյանն ավելացրեց, որ նման երկրաշարժերն ունեն դրական կողմ, քանի որ օգնում են երկրակեղևին ազատվել կուտակված էներգիայից։ –0–