ՀՅԴ–ն կոչ է անում երկխոսություն սկսել առանց նախապայմանների
ԵՐԵՎԱՆ, 21 ապրիլի./Նովոստի–Արմենիա/. ՀՅԴ–ն ողջունում է ՀՀ վարչապետ Սերժ Սարգսյանի կոչը անհապաղ երկխոսություն և բանակցություններ սկսելու վերաբերյալ։ Ինչպես հաղորդում է ՀՅԴ–ի մամուլի ծառայությունը, այս մասին հայտարարել է ՀՅԴ Հայաստանի Գերագույն մարմնի ներկայացուցիչ Արսեն Համբարձումյանը։
ՀՀ վարչապետ Սերժ Սարգսյանն այսօր ավելի վաղ կոչ է արել ԱԺ պատգամավոր Նիկոլ Փաշինյանին սկսել քաղաքական երկխոսություն, ինչին ի պատասխան` Փաշինյանը հանդես է եկել պատասխան հայտարարությամբ` նշելով, որ երկխոսություն տեղի կունենա միայն Սարգսյանի հրաժարականի դեպքում։
«Ողջունում ենք ՀՀ վարչապետի կոչը անհապաղ երկխոսություն և բանակցություններ սկսելու վերաբերյալ։ Դա Դաշնակցության առաջադրած ճանապարհին համահունչ է: Այս ճանապարհը կկանխի Հայաստանում ծավալված հետագա սրացումները, որոնք կարող են ծանր հետևանքների հանգեցնել մեր ժողովրդի և պետության համար», – նշել է Համբարձումյանը։
Նրա խոսքով, քաղաքական ողջամտությունն ու երկխոսությունը այն դուռն են, որ ժողովրդի դժգոհության ու երկրի առջև ծառացած բազմաթիվ հիմնախնդիրների լուծման համար կարող են իրական ճանապարհ հարթել:
«Համատեղ քաղաքական քննարկումների արդյունքում հնարավոր է ժողովրդի հրապարակ դուրս գալու խորքային և հիմնական պատճառները լուծել առավել անվտանգ ու անցնցում ճանապարհով: Այս հեռանկարը մենք իրական ենք համարում: Պահը զգայուն է և լի բազմաթիվ ներքին և արտաքին վտանգներով ու ռիսկերով. խոհեմությունը թելադրում է բանակցել՝ առանց վերջնագրերի ու նախապայմանների և համախոհությամբ առաջ բերել իրական, հստակ և ժամկետներով ամրագրված քաղաքական օրակարգ, որը կբխի մեր ժողովրդի և պետության շահերից, դուռ կբացի իրական և արագ տեսանելի փոփոխությունների համար», – ընդգծել է Համբարձումյանը։
Ապրիլի 13–ին «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության ղեկավար Նիկոլ Փաշինյանը Երևանում անցկացնում է շուրջօրյա հանրահավաքներ Սերժ Սարգսյանի վարչապետության դեմ։ Ապրիլի 16–ից հանրահավաքները վերածվեցին քաղաքացիական անհնազանդության համաքաղաքային ակցիաների։ Բողոքներն ուղեկցվում են բախումներով ցուցարարների և իրավապահների միջև, մասնավորապես, Բաղրամյան պողոտայում, փողոցների և առանցքային մայրուղիների, ինչպես նաև պետական հաստատությունների շենքերի արգելափակմամբ։ Ապրիլի 17–ին կազմակերպված հանրահավաքի ժամանակ Փաշինյանը հայտարարեց «թավշյա» հեղափոխության մասին։–0–
