Ադրբեջանի սոցիալ–դեմոկրատական կուսակցությունը հրապարակային ներողություն է խնդրել ՀՅԴ–ից և հայերից

ԵՐԵՎԱՆ, 9 մարտի. /Նովոստի–Արմենիա/. Ադրբեջանի սոցիալ–դեմոկրատական կուսակցությունը (ԱՍԴԿ) Սոցինտերնի XXV համագումարի ժամանակ հրապարակային ներողություն է խնդրել հայերի և ՀՅԴ–ի հասցեին հնչած վիրավորանքների համար, «Նովոստի–Արմենիա» գործակալությանն ասաց ՀՅԴ «Հայ դատի» կենտրոնական գրասենյակի ղեկավար Կիրո Մանոյանը։

Սոցինտերնի XXV համագումարն անցկացվել է մարտի 2–4–ը Կոլումբիայի Կարտախեն քաղաքում։ Համագումարին մասնակցել է 350 պատվիրակ` 86 կուսակցությունից և քաղաքական կազմակերպություններից։

Նրա խոսքով, 2016 թ.–ի Ժնևում Սոցինտերնի խորհրդի նիստի ժամանակ, երբ ՀՅԴ ներկայացուցիչ Մարիա Նալբանդյանը խոսում էր Ղարաբաղի մասին, ԱՍԴԿ–ի առաջնորդի որդին` Արազ Ալիզադեն, ոչ միայն կոշտ ելույթ ունեցավ` մեղադրելով հայերին և «Դաշնակցությանը» ցեղասպանություն կազմակերպելու մեջ, այլ նաև իր ելույթի թղթերը շպրտեց Նալբանդյանի սեղանին։

«Ամեն դեպքում մենք պաշտոնապես բողոքել էինք նրանց լիիրավ անդամի կարգավիճակ ունանելու դեմ, որովհետև սա ոչ միայն անարգում էր մեր նկատմամբ, այլև էթիկայի, Սոցինտերնի », – ասաց Մանոյանը։

Նա ավելացրեց, որ Էթիկայի հանձնաժողովը, որը քննարկում է Սոցինտերնի մասնակից կուսակցությունների անդամների պահվածքը, համագումարից առաջ որոշել էր, որ ԱՍԴԿ–ն պետք է նամակով ներողություն խնդրի, սակայն այդ կուսակցությունը պատրաստել էր նամակ, որտեղ ներողություն չկար։

«Մարիո Նալբանդյանը պնդեց, և նրանք ստիպված վեր կացան և հրապարակավ ներողություն խնդրեցին», – ասաց «Հայ դատի» ներկայացուցիչը։

Մանոյանը նաև տեղեկացրեց, որ համագումարի ընթացքում որոշում էր ընդունվել ընդհանուր բանաձևում ներառել կետ Լեռնային Ղարաբաղի մասին։ «Սոցինտերնը երկխոսության ակտիվացման կոչ է անում` ռազմական գործողություններին վերջ դնելու, լարվածությունը և սպառազինումը մեղմացնելու համար։ Մենք կոչ ենք անում միջազգային հանրությանը աջակցել ԵԱՀԿ ՄԽ–ի ջանքերին, որոնք ուղղված են տարածաշրջանում ամուր խաղաղության հաստատմանը», – նշվում է բանաձևում։–0-