Կառավարության 3-րդ մասնաշենքի մոտից ակցիայի 111 մասնակից բերման է ենթարկվել խուլիգանություն կատարելու կասկածանքով

ԵՐԵՎԱՆ, 30 մայիսի./Նովոստի–Արմենիա/. Այսօր Կառավարության 3-րդ մասնաշենքի մոտից ակցիայի 111 մասնակից խուլիգանություն կատարելու կասկածանքով բերման է ենթարկվել ոստիկանություն, հաղորդում է ՀՀ ոստիկանության մամուլի ծառայություն։

Ոստիկանության 3 ծառայող տեղափոխվել է բուժհաստատություն։

Հիշեցնենք, որ «Դիմադրություն» շարժումն այսօր առավոտյան երթով շարժվում է դեպի տարբեր նախարարություններ և պետական գերատեսչություններ` իմանալու համար հասարակության և պաշտոնյաների դիրքորոշումը ընդդիմության հայտարարության բոլոր կետերի վերաբերյալ, որով «Հայաստան» և «Պատիվ ունեմ» խմբակցությունները հունիսի 3–ին նախաձեռնել են ԱԺ արտահերթ նիստ։

Կառավարության 3–րդ մասնաշենքի մոտ տեղի ունեցավ բախում ոստիկանության և ցուցարարների միջև։

Ընդդիմության հայտարարության համաձայն, Հայաստանն աջակցելու է Արցախի ժողովրդի ինքնորոշման և միջազգային ճանաչման իրավունքի լիարժեք կատարմանը։ Հայաստանի համար անընդունելի է ղարաբաղյան հակամարտության կարգավորման որևէ վերջնական տարբերակ, որի արդյունքում Արցախը կարող է հայտնվել Ադրբեջանի կազմում։

Հիշեցնենք, որ «Քաղաքացիական պայմանագիր» իշխանական խմբակցությունը հրաժարվել է մասնակցել ընդդիմության նախաձեռնած արտահերթ նիստին, որը նվիրված է հայ–ադրբեջանական և հայ–թուրքական հարաբերություններին։–0–