ԵՐԵՎԱՆ, 13 հոկտեմբերի./Նովոստի–Արմենիա/. Վերջին 14 օրում կորոնավիրուսով վարակվածության դեպքերի աճը հասել է 113%–ի, տեղեկացրեց ՀՀ ԱՆ հիվանդությունների վերահսկման և կանխարգելման ազգային կենտրոնի ներհիվանդանոցային վարակների համաճարակաբանության բաժնի պետ Ռոմելլա Աբովյանն այսօր կայացած ճեպազրույցի ժամանակ։
Աբովյանը նշեց, որ այդ աճի պատճառները պարզ են. ելնելով ռազմական դրությունից` հասարակության ուշադրության կենտրոնում արտաքին թշնամին է, և հակահամաճարակային նորմերը չեն պահպանվում։
«Սակայն մենք չպետք է մոռանանք, որ այստեղ (երկրի ներսում, խմբգր.) ունենք անտեսանելի թշնամի, որն ուղղակիորեն թուլացնում է մեր թիկունքը», – ասաց նա։
Նրա խոսքով, ողջ աշխարհում արդեն ապացուցված է, որ կա ընդամենը 3 կանոն, որոնց պահպանման դեպքում կարելի է կանխել վիրուսի
տարածումը` դիմակի կրում, ձեռքերի ախտահանում և սոցիալական հեռավորության պահպանում։ Սակայն ռազմական դրության պայմաններում, մարդկանց կուտակումների դեպքում, քաղաքացիները չեն պահպանում անվտանգության նորմերը։
«Դա կարող է հանգեցնել նրան, որ հիվանդությունը կտարածվի և կհասնի սահմանին կանգնած զինվորներին։ Խնդրում եմ բոլորին, մենք ուժեղ ազգ ենք և կարող ենք միասին պայքարել այս հիվանդության դեմ», – հայտարարեց նա։
Աբովյանն ընդգծեց, որ յուրաքանչյուր քաղաքացի պատասխանատու է հակահամաճարակային նորմերի պահպանման և վիրուսի տարածման համար, այդ պատճառով բոլորը պետք է պայքարեն և վերահսկեն այդ կանոնների պահպանումը։
Հոկտեմբերի 13-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 57566 դեպք, որոնցից 46318-ն` առողջացած, 1032-ը` մահվան ելքով։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում