Հայտնի են «Ոսկե գնդակ» 2026 -ի արդյունքները
ԵՐԵՎԱՆ, 27 հոկտեմբերի․ /Նովոստի–Արմենիա/․ Մյունխենի «Բավարիայի» և Անգլիայի հավաքականի հարձակվող Հարի Քեյնն արժանացել է տղամարդկանց «Ոսկե գնդակ»-ի 2026 թվականի մրցանակին, , հայտնում է ՈՒԵՖԱ-ի պաշտոնական կայքը։
Մրցանակաբաշխությունն անցկացվել է հոկտեմբերի 26-ին Լոնդոնում։
Քեյնը դարձել է առաջին անգլիացի ֆուտբոլիստը վերջին 25 տարվա ընթացքում, որն արժանացել է տղամարդկանց «Ոսկե գնդակ»-ին։ Վերջին անգլիացի դափնեկիրը Մայքլ Օուենն էր, որը մրցանակը ստացել էր 2001 թվականին։ Քվեարկության արդյունքում Քեյնին հաջորդել են ֆրանսիացի Կիլիան Մբապեն և իսպանացի Լամին Յամալը։
2025/26 մրցաշրջանում Քեյնը «Բավարիայի» կազմում անցկացրած 51 խաղում խփել է 61 գոլ, իսկ ակումբի և ազգային հավաքականի կազմում նրա գոլերի ընդհանուր թիվը հասել է 73-ի։ Նա օգնել է «Բավարիային» նվաճել Գերմանիայի առաջնության տիտղոսը և 2025/26 մրցաշրջանն ավարտել ներքին երեք տիտղոսով։ Քեյնը նաև ճանաչվել է տարվա լավագույն ռմբարկու տղամարդկանց անվանակարգում։
Կանանց «Ոսկե գնդակ»-ին երրորդ անգամ արժանացել է Ալեքսիա Պուտելյասը, որը նախկինում մրցանակը ստացել էր 2021 և 2022 թվականներին։ 2025/26 մրցաշրջանում «Բարսելոնայի» կազմում հանդես եկած իսպանուհին ճանաչվել էր նաև ՈՒԵՖԱ-ի կանանց Չեմպիոնների լիգայի մրցաշրջանի լավագույն ֆուտբոլիստուհի։ Այդ մրցաշարում նա խփել է 7 գոլ և կատարել 7 գոլային փոխանցում։ 2026 թվականի ամռանը Պուտելյասը տեղափոխվել է անգլիական «Լոնդոն Սիթի Լայոնես»։
Մյուս մրցանակակիրները
Տղամարդկանց անվանակարգում տարվա լավագույն երիտասարդ ֆուտբոլիստ է ճանաչվել «Բարսելոնայի» իսպանացի հարձակվող Լամին Յամալը, լավագույն դարպասապահ՝ Իսպանիայի հավաքականի և «Ատլետիկ Բիլբաոյի» ֆուտբոլիստ Ունայ Սիմոնը, իսկ լավագույն մարզիչ՝ Իսպանիայի հավաքականի գլխավոր մարզիչ Լուիս դե լա Ֆուենտեն։ Տարվա լավագույն տղամարդկանց ակումբ է ճանաչվել ֆրանսիական ՊՍԺ-ն։
Կանանց անվանակարգում լավագույն երիտասարդ ֆուտբոլիստուհի է ճանաչվել «Բարսելոնայի» իսպանացի կիսապաշտպան Վիկի Լոպեսը, լավագույն դարպասապահ՝ «Բարսելոնայի» և Իսպանիայի հավաքականի ֆուտբոլիստուհի Կատա Կոլը, իսկ լավագույն մարզիչ՝ «Բարսելոնայի» գլխավոր մարզիչ Պերե Ռոմեուն։ Տարվա լավագույն կանանց ակումբ է ճանաչվել իսպանական «Բարսելոնան»։
Տարվա լավագույն ռմբարկուի՝ Գերդ Մյուլլերի մրցանակը կանանց անվանակարգում ստացել է մեքսիկացի հարձակվող Չարլին Կորալը, որը հանդես է գալիս մեքսիկական «Պաչուկա» ակումբում։
«Սոկրատես» մրցանակին, որը շնորհվում է հասարակական և մարդասիրական նախաձեռնությունների համար, արժանացել է «Արսենալի» և Անգլիայի հավաքականի ֆուտբոլիստ Բուկայո Սական։
«Ոսկե գնդակ»-ը հիմնադրվել է 1956 թվականին։ 2026 թվականի մրցանակաբաշխությունը նվիրված էր մրցանակի հիմնադրման 70-ամյակին։ 2024 թվականից մրցանակը կազմակերպվում է «France Football»-ի և ՈՒԵՖԱ-ի համատեղ համագործակցությամբ։
