ԵՐԵՎԱՆ, 22 հոկտեմբերի./Նովոստի–Արմենիա/. ՀՀ սպորտի և երիտասարդության հարցերի նախարար Գաբրիել Ղազարյանը չի հավատում, որ Հայաստանի ֆուտբոլի հավաքականը կարող էր «վաճառել» Ալբանիայի հավաքականի հետ կայացած հանդիպումը։
Ավելի վաղ kurir.rs սերբական կայքը գրել էր, որ ալբանացիները Հայաստանի հավաքականի չորս ֆուտբոլիստներին վճարել էին 500 հազարական եվրո խաղում պարտություն կրելու համար։ Սակայն, սերբական հրատարակությանն ի պատասխան, ՈւԵՖԱ–ում հայտարարեցին, որ Հայաստան–Ալբանիա խաղում հայկական թիմի պարտվելու պատճառները չեն ուսումնասիրվի, քանի որ կազմակերպությունը որևէ կասկած չունի։ Հայաստանի հավաքականի դարպասապահ Գևորգ Կասպարովը վճռորոշ կերպով հերքել է իր թիմի խաղացողներին կաշառելու հնարավորությունը։
«Ես ինքս չեմ հավատում, նման բան չի կարող լինել», – հինգշաբթի լրագրողներին ասաց Ղազարյանը։
Նախարարի կարծիքով` համապատասխան կառույցները քննարկում են իրավիճակը, մասնավորապես` Հայաստանի ֆուտբոլի ֆեդերացիայի նախագահը։ Նա ավելացրեց, որ տեղյակ չէ, թե ինչ է կատարվում ֆեդերացիայի ներսում։
Ղազարյանի խոսքով` Սպորտի և երիտասարդության հարցերի նախարարությունը չի միջամտում ֆեդերացիաների աշխատանքներին, նրանց համագործակցությունը սահմանափակվում է տարբեր հարցերում աջակցություն ցուցաբերելով։
Ալբանիայի հավաքականը հայկական թիմի հետ խաղում հաղթելու շնորհիվ պատմության ընթացքում առաջին անգամ հայտնվեց Եվրոպայի առաջնության եզրափակիչ փուլում։
Անօրինական գործունեության ապացույցների բացահայտման դեպքում Ալբանիայի հավաքականը կհեռացվի Եվրո–2013–ի մասնակիցների ցանկից։ Այդ դեպքում մրցաշարում նրա տեղը կզբաղեցնի Դանիայի հաքականը, իսկ Սերբիան կմասնակցի անցումային հանդիպումներին։ –0–
