Թուրքիայում մտադիր են տխրահռչակ 301–րդ հոդվածը կիրառել Կարո Փայլանի նկատմամբ

ԵՐԵՎԱՆ, 11 հունվարի. /Նովոստի–Արմենիա/. Դիարբեքիրի դատախազությունը Թուրքիայի մեջլիսի հայ պատգամավոր Կարո Փայլանի դեմ հետաքննություն է սկսել այդ երկրի քրեական օրենսգրքի 301 հոդվածի հատկանիշներով: Այս մասին գրում է «Ագօս» թերթը։

Թուրքական քրեական օրենսդրության 301–րդ հոդվածը պատիժ է նախատեսում Թուրքիայի, թուրք ազգության կամ թուրքական կառավարական կառույցները վիրավորելու կամ նսեմացնելու համար։ 2008 թ. ապրիլի 30-ին մի շարք փոփոխություններ են արվել նշյալ հոդվածում, սրանց թվում նաև մի լրացում, որը պարտավորեցնում է արդարադատության նախարարության թույլտվության ստացումը քրեական գործի հարուցման համար։

Դատախազությունն արդեն Փայլանի նկատմամբ գործ է կազմել, որի հիման վրա միջնորդագիր է ուղարկել խորհրդարան՝ պատգամավորին անձեռնմխելիությունից զրկելու պահանջով: Դատախազությունը հետաքննություն սկսելու համար ստացել է նաև արդարադատության թույլտվությունը:

Փայլանի վերաբերյալ գործը կազմվել է՝ հիմնվելով 2018 թվականի հուլիսի 25-ին մեջլիսում տեղի ունեցած ԺԴԿ-ի խմբակցության ժողովից հետո Փայլանի ունեցած ելույթում, ինչպես նաև դրանից 2 օր հետո տված հարցազրույցում հնչեցրած արտահայտությունների վրա: Դատախազը պատրաստվում է զրկել Փայլանին անձեռնմխելիությունից, որպեսզի հնարավորություն լինի նրան դատել։

Փայլանն արձագանքել է իր վերաբերյալ անձեռնմխելիությունից զրկելու դատախազության պահանջին՝ ասելով, որ գործի համար հիմք հանդիսացած ելույթներում ինքը ներկայացրել է Դիարբեքիրում տիրող իրավիճակը:


Թուրքիայի քրեական օրենսգրքի 301-րդ հոդվածի հատկանիշներով մեղադրվում էր «Ագօս» թերթի հիմնադիր, գլխավոր խմբագիր Հրանտ Դինքը: -0-