Տոն օրգանիզմի համար կամ հետամանորյա բեռնաթափման օրեր

ԵՐԵՎԱՆ, 9 հունվարի. /Նովոստի-Արմենիա/. Ամանորյա «ծույլ» տոները սթրես են օրգանիզմի համար, այդ իսկ պատճառով անմիջապես Նոր տարվա տոնակատարությունից հետո հարկավոր է օրգանիզմի համար ճիշտ բեռնաթափման օրեր կազմակերպել:

Դիետոլոգները խորհուրդ են տալիս առաջին հերթին ազատվել ամանորյա ճաշատեսակների մնացորդներից և ժամկետանց մթերքից:

«Ոչ մի դեպքում չի կարելի լրացուցիչ մշակել դրանք: Հիշեք` մեր մարմինը ամենաթանկն է, ինչ մենք ունենք, և այն աղբարկղ չէ` այնտեղ ժամկետանց մթերք նետելու համար», - նշում են նրանք:

Դիետոլոգների խոսքով, շատերը սխալմամբ կարծում են, թե կուշտ տոներից հետո ավելի լավ է մի քանի օր ոչինչ չուտել: Սակայն նրանք կտրականապես խորհուրդ չեն տալիս նման կերպ ձերբազատվել հագեցվածության զգացումից:

«Միայն երիտասարդ առողջ մարդիկ, ովքեր առողջության հետ ոչ մի խնդիրներ չունեն, կարող են իրենց թույլ տալ ոչինիչ չուտել մեկ օրվա ընթացքում, բայց ոչ ավել, իսկ մնացած բոլորին սովը արգելված է: Ամենից ճիշտը հետամանորյա օրերին «ծանր» ուտելիքից զերծ մնալն է, հաճախ և փոքր բաժիններով սնվելը, շատ հեղուկ խմելը», – խորհուրդ են տալիս նրանք:

Դիետոլոգները պնդում են, որ օրգանիզմը ծանրաբեռնվածությունից դուրս բերել կօգնի սուրճը, որն ազատում է ստամոքսում ծանրության զգացումից և խումհարից (ալկոհոլային խմիչքների չարաշահման դեպքում):

«Հետամանորյա օրերին սնվեք թեթև սնունդով, հրաժարվեք քաղցրից, ճարպոտ ուտեստներից, ավելի շատ բանջարեղեն, միրգ և կաթնամթերք օգտագործեք», - նշում են դիետոլոգները:

Նրանց խոսքով, ավելորդ կիլոգրամները, որ շատերը կուտակում են տոների ժամանակ, ճարպ չէ, այլ` ավելորդ ջուր, որից օրգանիզմը չի հասցնում արագ ազատվել: Այդ իսկ պատճառով մեկ-երկու օր թեթև դիետան բավարար է նախկին կազմվածքը հետ բերելու համար:

Դիետոլոգները խորհուրդ են տալիս առողջ սննդակարգի սկզբունքներին հետևել ոչ միայն մի քանի օր, այլ` ողջ տարվա ընթացքում: -0-