Մշակվել է ասթմայի դեմ պայքարի նոր մեթոդ

ԵՐԵՎԱՆ, 28 մայիսի. /Նովոստի-Արմենիա/. Գենթի համալսարանին կից կենսատեխնոլոգիաների ֆլամանդական ինստիտուտի բելգիացի գիտնականները մշակել են հակամարմիններ, որոնք տարրալուծում են Շարկո-Լեյդենի բյուրեղները, սա նյութ է, որը բորբոքում է առաջացնում ասթմայով տառապողների շնչուղիներում, հայտնում է ՏԱՍՍը` հղում անելով Belga-ին:

Գիտնականները թեստեր են անցկացրել լաբորատոր մկների վրա, որոնց հատուկ հակամարմիններ են ներարկել: Գիտափորձի ընթացքում բյուրեղները լուծվել են ընդամենը մի քանի րոպեում, ինչից հետո մկների վիճակը կտրուկ բարելավվել է: Գիտնականները կարծում են, որ մեթոդը կօգնի հակաասթմատիկ թերապիայի նոր տարբերակ ստեղծել:

Ինստիտուտի պրոֆեսոր Սավաս Սավիդեսը երկար տարիներ է ուսումնասիրել այս ոլորտը և ապշել է, երբ տեսել է թեստի արդյունքները:

Պրոֆեսոր Բարտ Լամբրեխտն իր հերթին նշել է, որ այս կերպ ասթման ամբողջովին բուժել չի հաջողվի, բայց հնարավոր կլինի զգալիորեն բարձրացնել թերապիայի արդյունավետությունը: Հիվանդության վրա ազդում են կեղտոտ օդը, ժառանգականությունը և ալերգիայի առկայությունը: Այս պահին չկա միջոց, որն ամբողջովին բուժում է մարդուն ասթմայից: -0-