9 կգ՝ 12 շաբաթում. հիանալի նախաճաշի երեք տարբերակ նիհարելու համար

ԵՐԵՎԱՆ, 7 սեպտեմբերի./Նովոստի-Արմենիա/. Որակավորված ֆիթնես մարզիչ Ահարոն Բրաունը նշել է նիհարելուն նպաստող նախաճաշի երեք տարբերակ, հաղորդում է lenta.ru-ն` հղում անելով Express հրատարակությանը:

Նիհարել ցանկացողներին փորձագետը խորհուրդ է տալիս լավ նախաճաշել՝ ախորժակը գրագետ ձևով կառավարելու համար: Նա նկարագրել է քաշի նվազեցման համար երեք հիանալի նախաճաշ: Առաջին դեպքում նա խորհուրդ է տալիս կաթնամթերք, թռչնամիս, տավարի միս, սպիտակ ձուկ և ծովամթերք: Ոչ յուղալի սպիտակուցով հարուստ սնունդը ավելի արագ է հագեցնում քաղցը և թույլ չի տալիս շատ ուտել:

Առողջ նախաճաշի երկրորդ տարբերակն իր մեջ ներառում է սպիտակուցի, առողջարար ճարպերի և բջջանյութի բարձր պարունակությամբ մթերքներ, օրինակ, սաղմոն ձուկը, ձուն, մրգերն ու բանջարեղենը: Իսկ առավոտյան սնվելու երրորդ տարբերակը ձվով ուտեստներն են ավոկադոյի, յուղոտ ձկան, սպանախի, սնկի և բանջարեղենի զուգորդմամբ:

Վկայակոչելով անցկացված հետազոտությունը՝ Բրաունը պնդում է, որ առավոտյան ամենօրյա սննդակարգի մեծ մասն ուտելը նվազեցնում է սովը և նպաստում քաշի կորստին:

Նա նշում է, որ ցանկալի է նախաճաշին նախատեսել օրական կալորիաների 50 տոկոսը, 30 տոկոսն ուտել ճաշի ժամանակ, իսկ մնացածը՝ ընթրիքի:

«Փորձարկման մասնակիցները, ովքեր պահում էին այս սննդակարգը, 12 շաբաթում կորցրել են մոտ 9 կգ, իսկ նրանք, ում կերակուր ընդունելու հիմնական ժամանակը ճաշն է, կորցրել են 3,5 կգ»,- ընդգծել է ֆիթնես մարզիչը: -0-