Հայոց ցեղասպանության կազմակերպիչներից մեկի՝ Ջեմալ փաշայի թոռը ճանաչում է Ցեղասպանությունն ու կիսում հայերի ցավը

ԵՐԵՎԱՆ, 24 ապրիլի․ /Նովոստի-Արմենիա/․ Հայոց ցեղասպանության կազմակերպիչներից մեկի՝ Ջեմալ փաշայի թոռը՝ թուրք լրագրող և գրող Հասան Ջեմալը Twitter-յան իր էջում գրառում է կատարել Հայոց ցեղասպանության մասին։

«Իմ հայ եղբայրնե՛ր, ապրիլի 24-ը ցեղասպանություն է, ցավ, ես կիսում եմ»,- գրել է նա։

Հասան Ջեմալը 1981-1992 թվականներին եղել է  Ջումհուրիյեթ թերթի, 1992-1998 Սաբահի գլխավոր խմբագիրը։ 2013 թվականին, երբ Էրդողանի քննադատությունից հետո Միլլիյեթը հրաժարվեց նրա սյունակից, նա հեռացավ Միլլիյեթից։

Հասան Ջեմալը ճանաչել է Հայոց ցեղասպանությունը, որ կազմակերպել էր նրա պապը իր գործընկերների հետ միասին, և ներողություն խնդրել։

Նա 2008 թվականի սեպտեմբերին այցելել է Ծիծեռնակաբերդ և ծաղիկներ դրել Հայոց ցեղասպանության հուշահամալիրին։ Ջեմալը 2010-ի ապրիլի 24-ին գրել էր, թե հարյուր հազարավոր հայերի կոտորածը ժխտելը նշանակում է հանցակից դառնալ մարդկության դեմ իրագործված ոճրագործությանը։ 2011 թվականի մարտի 31-ինՀասան Ջեմալը Լոս Անջելեսում մասնակցել է հայկական սփյուռքի կազմակերպած «Դեր Զորից մինչև Ծիծեռնակաբերդ» խորագիրը կրող համաժողովին։ 2014 թվականի դեկտեմբերի 11-ին եղել է Սիվիլիթաս հիմնադրամի «Սարն ի վեր» նախագծի հերթական միջոցառման հյուրը Երևանում։ 2012 թվականին Ջեմալը տպագրել է իր «1915. Հայոց ցեղասպանություն» գիրքը՝ նկարագրելով իր անձնական փոխակերպումը մարդուց, որը մերժում էր Հայոց ցեղասպանությունը, մարդու, որն ընդունում է այն։

Նրա պապը՝ Ջեմալ փաշան եղել է թուրք պետական և ռազմական գործիչ, «Միություն և առաջադիմություն» կուսակցության պարագլուխներից, երիտթուրքերի ղեկավար «եռյակի» (Թալեաթ և Էնվեր փաշաների հետ) անդամ, հայերի ցեղասպանութան  գլխավոր կազմակերպիչներից։

1922 թ. հուլիսի 25-ին, «Նեմեսիս» գործողության  շրջանակներում  Թիֆլիսում  սպանվել է հայ վրիժառուներ Պետրոս Տեր-Պողոսյանի և Արտաշես Գևորգյանի կողմից։-0-

Ermeni kardeşlerimin
24 Nisan soykırım
acısını
paylaşıyorum.

— Hasan Cemal (@hsncml) April 23, 2020