«Տարիներով չկրթվեց ու չզարգացավ մեր հասարակության մի ստվար զանգված ու...».Սոնա Ռուբենյանի մայրն արձագանքել է դստեր հարսանեկան զգեստը քննադատողներին (ՖՈՏՈ)

ԵՐԵՎԱՆ, 28 նոյեմբերի./Նովոստի–Արմենիա/. Երեկ հայտնի երգչուհի Սոնա Ռուբենյանի և նրա ընտրյալ Էմիլի հարսանեկան արարողություն էր։

Համացանցը ողողված էր Սոնայի ու նրա ընտրյալի երջանիկ լուսանկարներով, բայց օգտատերերի ուշադրությունից չէր վրիպել Սոնայի յուրօրինակ հարսանեկան զգեստը, որը մեծ քննարկումներ էր առաջացրել։

Սոնայի մայրը` Արմինե Սարգսյանը, անդրադարձել է այդ քննարկումներին Facebook–յան իր էջում։

Նշենք, որ hraparak.am–ի հաղորդմամբ, Սոնայի հարսանեկան զգեստի հեղինակը լիբանանցի հայտնի դիզայներ Զուհար Մուրադն է։ Վերջինս դարձել է ժամանակակից նորաձևության աշխարհի ամենաճանաչված անուններից մեկը: Ամեն տարի նա թողարկում է շքեղ զգեստների նոր տեսականի, որը հայտնվում է կարմիր գորգին կամ մեկ այլ իրադարձության ժամանակ:

Ստորև ներկայացնում ենք Արմինե Սարգսյանի գրառումը.

«Երեկ մեր ընտանիքում շատ կարևոր իրադարձություն էր...
Ամուսնացրեցինք մեր ավագ դստերը,մեր առաջնեկին,մեր աչքի լույսին...
Երկու տարի ընկերություն արեցին մեր Սոնան ու Էմիլը,իսկ երբ ժամանակը եկավ ընտանիք կազմելու՝ վրա հասավ մեր ազգային ողբերգությունը...

Որոշեցինք սպասել, մինչ կլրանա տղերքի տարին...Այնպես չէ,որ ցավն է մեղմացել,կամ երկրի իրավիճակն է կայունացել ու դրական որևիցե մի բան կա ի շահ հայրենիքի,բայց...

Բայց պետք է ապրել,ստիպել մեզ ու ապրել, հիշել, պայքարել, լացած աչքերը սրբել ու նայել ապագային,թեկուզ մշուշոտ, անորոշ, չուրվագծվող, բայց հավատով լի ապագային...

Մեր երիտասարդները պիտի ապրեն այս երկրում, կայանան, ընտանիքներ կազմեն, շատ երեխաներ ունենան, դաստեարակեն, կրթեն, սիրեն իրենց երեխաներին, քանզի ընտանիքների ամրությունից ու որակից է կախված մեր լավ օրը...Շատ բան էդ առումով բաց թողեցինք...Տարիներով չկրթվեց ու չզարգացավ մեր հասարակության մի ստվար զանգված ու... Ունենք էն, ինչ ունենք...Չարացել է մեր հասարակությունը, հեռվացել քրիստոնեական արժեքներից...Մենք մեր գլխին եկածից դասեր չենք քաղում, չենք ուզում հասկանալ, որ իրար ատելով, չարախոսելով, նախանձով ու վիրավորելով, կորցնում ենք մեր ազգային իմունիտետը, որակը ու հաջորդիվ ամեն ինչ...

Շնորհակալ եմ Սոնայիս հարսանյաց հանդեսի բոլոր ներկաներից, բոլոր շնորհավորանքներ հղողներից, բոլոր այն բարի մարդկանցից, ովքեր ուրախացան մեր ուրախությամբ...

Ցավում եմ համացանցում իրար հերթ չտվող ու Սոնայիս հարսանյաց զգեստը օրվա բամբասանքի ու իրենց չարության մաղձը հեռախոսի ստեղնաշարի միջոցով դուրս նետող այն զանգվածի համար, ովքեր արդեն անուղղելի են (մեզ այս մի երեք տարին ցույց տվեց), իրենց կյանքում ոչինչ չարած՝ոչ իրենց ,ոչ հայրենիքի համար անդեմ մարդիկ կարող են կարծիք հայտնել ու չհասկանալ, որ վաղուց նորաձևությունը հարսանյաց, պլաստմասայից կարված, ճռճռան, մեեեծ տարածություն զբաղեցնող զգեստի այլընտրանքային տարբերակներ է ստեղծել...»։–0–