Մարատ Բաշարովը կնոջ ծննդյան օրը կնշի Երևանում. ԷՔՍԿԼՅՈւԶԻՎ

ԵՐԵՎԱՆ, 6 նոյեմբերի./Նովոստի–Արմենիա/. Ռուս հայտնի դերասան Մարատ Բաշարովը կնոջ ծննդյան օրը կնշի Երևանում։

Այս մասին նա հայտնեց «Նովոստի–Արմենիա» գործակալության թղթակցին Երևանում Jamiroquai խմբի համերգից առաջ։

«Վաղը կժամանի կինս` որդու հետ, վաղը կնոջ ծննդյան օրն է։ Մենք նշում ենք այն Երևանում», – ասաց նա։

Բաշարովն ասաց, որ այցելել է Հայաստան` Արսեն Աղաջանյանի «Քեզ հաղթանակ կնվիրեմ» ֆիլմի պրեմիերային և չէր սպասում, որ այսօր կհայտնվի համերգի։

«Գիշերն եմ ժամանել։ Առավոտյան հեռուստաընկերությունում էինք, իսկ երեկոյան ես արդեն Jamiroquai–ի համերգին եմ։ Սա անհավանական է, նման բան կյանքումս երբեք չի եղել։ Ես եկել էի ընկերներիս մոտ` ֆիլմի պրեմիերայի, իսկ հայտնվեցի նման մեծանուն երաժշտի համերգին, շատ շնորհակալ եմ», – նշեց դերասանը։

Նա նաև ընդգծեց. «Ամենահամեղը Հայաստանում մարդիկ են»։

«Խոստանում եմ, որ մի քանի օր հաստատ կմնամ, քանի որ շատ եմ սիրում այս քաղաքը, այս երկիրը։ Շատ եմ սիրում այս օդը, քանի որ այստեղ համեղ է ոչ միայն ուտելիքը, այլև օդը, համեղ է այն, թե ինչպես են մարդիկ ժպտում և նայում քեզ», – ասաց նա։

Նրա խոսքով, նա բազմաթիվ անգամ եղել է Հայաստանում և «դեռ բազմաթիվ անգամ» այցելելու է։

Պատասխանելով այն հարցին, թե ունի՞ արդյոք, Հայաստանում ստեղծագործական պլաններ` Բաշարովն ասաց. «Եթե ախպերները կանչեն, ես հաճույքով կհամաձայնեմ»։–0–