ԵՐԵՎԱՆ, 10 հունվարի./Նովոստի–Արմենիա/. Հաղորդավար, լրագրող և դերասանուհի Արուսիկ Տիգրանյանը Instagram-ի իր էջում գրառում է արել, որտեղ իր հետևորդներին տեղեկացրել է, որ որոշել է մասնագիտական դադար վերցնել:
«Որոշել եմ դադար վերցնել մասնագիտությունիցս, որի համար խելագարվում եմ: Իմ հոգեբանական փնտրտուքների առաջին բացահայտումներից էր. գերազանցիկության սինդրոմ ունեմ, ինչն էնքան էլ լավ բան չի»,- գրել է նա։
Նա նաև հայտնել է, որ համալսարան ընդունվելու տարիներից սկսած միշտ վազքի մեջ է եղել։ Սկզբում շատ է ցանկացել անվճար ընդունվել, ինչը ստացվել է։ Հետո համալսարանում էլ անդադատ վազվզում էր լավ լրագրող դառնալու համար, ամեն գրած նյութի ու նկարած վիդեոյի մեջ իրեն ներդրել է ամբողջությամբ։
«Ուր ասես ընդունվեցի աշխատանքի ու չեմ փոշմանել, ամեն օրս ինձ նոր բան ա սովորացրել։ Փինկ թիվին իմ անսահման սիրո արդյունքն էր, ու իրան նվիրվել էի ավելի շատ, քան նոր սիրահարված մարդիկ են նվիրվում սիրելիներին։ «Լավ երեկո»-ն էլ իմ մասնագիտական պիկն էր, ամեն ռեպորտաժս նոր մարտահրավեր ա եղել իմ համար, երևի քչերը կպատկերացնեն, բայց շատ նկարահանումներ սարսափելի ծանր, երբեմն արցունքներով ու ներվերով լի են եղել։ Ինչ ջուռի մարդու հետ ասես շփվել եմ լավ նյութ ստանալու համար, ու էլի, չեմ զղջում, էդ իմ համար ահավոր հաճելի, կարևոր ու հետաքրքիր ճանապարհ էր»,- գրել է նա։
Սկսնակ դերասանուհին կիսվել է նաև իր դերասանական առաջին քայլերի մասին: Նա նշել է, որ շատ հետաքրքիր ու ինքն իր մասին նոր բացահայտումների, շատ կոմպլեքսների հանդիպելու ու դրանք կոտրելու, աշխատելու, բուժելու գործընթաց էր։
«Բայց էդ վազքի մեջ նաև շատ ա եղել «աշխատել, պարապ չմնալու համար»-ը։ Վստահ եմ՝ շատերն են ունենում էդ զգացումը, որ երբ գործ չես անում, քեզ անպետք ու կյանքից հետ մնացած ես զգում, նաև շատ ա լինում, երբ հիմար առաջարկներ ենք ընդունում փող աշխատելու և ուրիշ լիքը պատճառների համար»,- գրել է Արուսիկը։
Նա նաև անկեղծացել է, որ վերջերս եղել են պրոեկտներ, որտեղ ինքն իր արածը չի հավանել, բայց այս անգամ ոչ թե գերազանցիկի աչքերով, այլ շատ ավելի անկեղծ։ Վստահ է, որ դա այն չէ, ինչ ուզում էր անել, երբ համալսարանում երազում էր հայտնի լրագրող դառնալու մասին։
«Էս տարին սկսելիս որոշեցի, որ ինքս իմ ու իմ մասնագիտության սիրո հանդեպ շատ հարգալից կլինի, եթե մի պահ կանգ առնեմ։ Արդեն սովորել եմ չաշխատելու պատճառով չվատանալ ու ինքս ինձ ներսից չուտել, սովորել եմ վայելել անգործ առավոտները։ Մի խոսքով որոշել եմ գոնե մի կես տարով չլինել ոչ մի թիվիում ու զբաղվել ինքնակրթությամբ, հանգստանալով, ու վերլուծելով իմ անցած վերջին տարիները։ 26 տարեկանը, ու դե բոլոր տարիքները, շատ հարմար ժամանակ ա վերաարժևորումների համար»,- գրել է նա։
Նա վստահ է, որ բոլորը սպասում են, թե երբ է վերջապես երեխա ունենալու, և նաև դրա համար ուզում է սովորել լիարժեք երջանիկ լինել առանց աշխատանքային ու ֆինանսական կախվածությունների, որ հետո ուրիշ մեկին էլ կարողանա դա սովորեցնել։
«Առաջիկա ամիսներին ինձ կնվիրեմ իմ սիրած բաներին՝ ինստագրամ, համով ուտելիքներ, ճամփորդություն ու սիրելի մարդիկ, ավելի շատ կզբաղվեմ վլոգերով ու հոգեբանությամբ», – անկեղծացել է նա։
Վերջում հավելել է, որ եթե հանկարծ հայտնվի էկրաններին, ուրեմն դա այնքան աննախադեպ մի պրոեկտ պետք է լինի, որը արժանի կլինի այս որոշումը չեղարկելում:–0–