ԵՐԵՎԱՆ, 14 մայիսի․ /Նովոստի-Արմենիա/․ ՀՀ Բարձրագույն որոակավորման կոմիտեի նախագահ Սմբատ Գոգյանը պաշտոնից ազատման դիմում է ներկայացրել և այդ մասին հայտնել իր Facebook-յան էջում։
Ըստ նրա՝ իր որոշումս ունի երեք շերտ․
Առաջինն այն է, որ Կրթության և գիտության բարեփոխման իր պատկերացումները չեն համընկել նախարարության ռազմավարության հետ և ժամանակի ընթացքում այդ հակասությունները խորացել են։
«Չնայած այդ տեսակետերի տարբերության, աշխատել եմ խղճի թելադրանքով։ Համակարգում բարեփոխում անելու համար անհրաժեշտ էին օրենքի կողմից լիազորող նորմեր, որոնք ստանալ այդպես էլ չկարողացա։ Իսկ նախարարի կողմից ԱԺ ամբիոնից նոր օրենքով ԲՈԿ-ը փակելու հայտարարությունից հետո աշխատելը դարձավ անիմաստ։ Իմ գաղափարներն այլևս կյանքի կոչել չեմ կարող։ Գրագողերը սպասում են կառույցի փակվելուն»,- գրել է նա։
Գոգյանը հիշեցրել է, որ 2019 թվականի օգոստոսին հարցազրույցներից մեկում ինքն ասել է, որ եթե Ռ․ Հայրապետյանը հրաժարականի դիմում չգրեր, ապա ինքը կգնար։
Загружается новость ... "Лево"
«Իմ խոսքը կոնկրետ Ռուբենի մասին չէր, այլ երևույթի։ Նրանից հետո նշանակված ռեկտորի ժամանակավոր պաշտոնակատարի դոկտորական աշխատանքում առկա են ակնհայտ թարգմանություններ և արտագրություններ, բայց համապատասխան կապերի և հովանավորչության միջոցով նա առ այսօր զբաղեցնում է իր պաշտոնը։ Իր պաշտոնավարումն արժեքային ընտրություն է՝ իմ և իր միջև»,- ասվում է գրառման մեջ։
Նա նշել է, որ նշանակումից երեք ամիս անց իր կնոջ հետ պայմանավորվել է, որ եթե նա ասի, որ ինքը մեծամտացել կամ հղփացել է, ապա նույն օրն աշխատանքից ազատման դիմում կգրի։
«Նա այդպիսի բան դեռ չի ասել, բայց իր կարծիքով ես սկսել եմ ավելի քիչ ուրախանալ։ Իսկապես, այս աշխատանքն ինձ սկսել է հաճույք չպատճառել, քանի որ հստակ գիտակցում եմ, որ աշխատանքիս արդյունավետությունը կտրուկ ընկել է»,- գրել է Գոգյանը։
Սմբատ Գոգյանը ՀՀ Բարձրագույն որոակավորման կոմիտեի նախագահ է նշանակվել 2018 թ․-ի հունիսի 12-ին։ -0-
