215 դոլար 150–ի փոխարե՞ն. Երևանը շարունակում է բանակցությունները գազի գնի վերաբերյալ

ԵՐԵՎԱՆ, 20 դեկտեմբերի. /Նովոստի-Արմենիա/. ՀՀ փոխվարչապետի պաշտոնակատար Տիգրան Ավինյանի մամուլի խասնակ Վահան Հունանյանը Facebook-ի իր էջում հայտարարություն է տարածել ռուսական գազի գնի վերաբերյալ:

Նշենք որ այսօր «168 ժամ» օրաթերթը գրել էր, որ ՌԴ փոխվարչապետ Դմիտրի Կոզակը նամակ է հղել ՀՀ կառավարություն, մասնավորապես՝ փոխվարչապետ Տիգրան Ավինյանին՝ նշելով, որ ռուսական գազը սահմանին լինելու է 215 դոլար 1000 խմ-ի դիմաց, և դա քննարկման ենթակա չէ:

«Այս պահին գազի գնի առնչությամբ որոշում չկա և չկա որևէ ամրագրված սակագին», - գրել է նա:

Հունանյանը նշել է նաև, որ ՀՀ կառավարությունը ՌԴ փոխվարչապետ Դմիտրի Կոզակի կողմից նամակ չի ստացել, նման նամակ գոյություն չունի: «ՌԴ փոխվարչապետ Դմիտրի Կոզակը և ՀՀ փոխվարչապետի պաշտոնակատար Տիգրան Ավինյանն ունեցել են հեռախոսազրույց, որի ժամանակ քննարկվել է բանակցությունների ընթացքի ձևաչափը և հետագա փուլերը: Այս հարցի վերաբերյալ մեր ռուս գործընկերների հետ ընթանում են բանակցություններ փոխվստահության և փոխըմբռնման միջավայրում, որտեղ վերջնագրեր չեն եղել և չեն կարող լինել», - գրել է նա:-0-