Մեծ և աղմկահարույց դատ կլինի. Կոնստանտին Օրբելյան

ԵՐԵՎԱՆ, 29 մարտի. /Նովոստի-Արմենիա/. Կոնստանտին Օրբելյանը մեկնաբանել է Ալ. Սպենդիարյանի անվան օպերայի և բալետի ազգային ակադեմիական թատրոնի տնօրենի պաշտոնից ազատումը`հայտարարելով, որ մշակույթի նախարարի պաշտոնակատար Նազենի Ղարիբյանի փաստարկներն անօրինական են:

Ուրբաթ հայտնի է դարձել, որ Օրբելյանն ազատվել է թատրոնի տնօրենի պաշտոնից, սակայն կշարունակի զբաղեցնել գեղարվեստական ղեկավարի պաշտոնը:

«Ղարիբյանը որոշել է, որ ինձ ոչ լեգիտիմ կերպով են նշանակել այդ պաշտոնին: Այսինքն, նա համարում է, որ պետությունը մեկուկես տարի առաջ իրավունք չուներ նշանակել ինձ այդ պաշտոնին», - ասաց Օրբելյանը:

Նա պատասխանեց նաև լրագրողների այն հարցին, թե մտադիր է դիմել դատարան:

«Պարտադիր լինելու է մեծ և աղմկահարույց դատ», - ասաց նա` նշելով, որ թատրոնը դատի կտա Ղարիբյանին։

Նա հայտարարեց, որ նախապես չի ստացել ոչ մի նախազգուշացում ազատման մասին: Օրբելյանը հայտնեց նաև, որ Ղարիբյանն արդեն 9 ամիս փորձում է հասնել նրա ազատմանը, ինչի հետ նա բացարձակ համաձայն չէ:

Հարցին, թե կարո՞ղ է դա պայմանավորված լինել անձնական խնդիրներով` նա ասաց. «Միգուցե ես նրա դուրը չեմ գալիս»:

Օրբելյանը հաստատեց նաև, որ կմնա թատրոնի գեղարվեստական ղեկավարի պաշտոնում:

«Այստեղ եմ, մնում եմ: Այս թատրոնի մեջ շատ ժամանակ, կյանք եմ ներդրել, առջևում բազմաթիվ ծրագրեր կան», - ասաց Օրբելյանը:

Այսօր ավելի վաղ ՀՀ մշակույթի նախարարության իրավաբանական վարչության պետ Անուշ Ղազարյանը «Նովոստի-Արմենիա» գործակալությանը հայտնեց, որ օրենքի տառին համաձայն` տնօրենը չի կարող զբաղեցնել այլ պաշտոն կամ ունենալ այլ վարձատրվող աշխատանք:

Ղազարյանը նաև հայտնեց, որ Մշակույթի նախարարությունը մեկ անգամ չէ, որ բանավոր դիմել է Օրբելյանին` խնդրելով ընտրել պաշտոններից մեկը, սակայն Օրբելյանը նշել է, որ պատրաստ չէ հրաժարվել որևէ մեկից:

Ավելի վաղ հաղորդվում էր, որ Հայաստանում իշխանափոխությունից հետո, Օրբելյանի և Մշակույթի նախարարության նոր ղեկավարության միջև լուրջ տարաձայնություններ են ի հայտ եկել: Մշակույթի նախարար Լիլիթ Մկունցը օգոստոսի 27-ին` իր գործունեության 100 օրվա արդյունքներով, մամուլի ասուլիսում նշել է թատրոնում լուրջ կառուցվածքային փոփոխությունների անհրաժեշտության մասին: Նա, մասնավորապես, նշել է թատրոնի գործունեության արդյունավետության բարձրացման հնարավորության մասին, եթե տնօրենի և գեղարվեստական ղեկավարի պաշտոնները զբաղեցնեն տարբեր մարդիկ: Ի պատասխան Օրբելյանը հայտարարել էր, որ Մակունցի գաղափարը, իր կարծիքով, քիչ արդյունավետ է:

Աշխարհահռչակ դիրիժոր Հարրի Կոնստանտին Օրբելյանն Ալեքսանդր Սպենդիարյանի անվան օպերայի և բալետի ազգային ակադեմիական թատրոնի տնօրենի պաշտոնում նշանակվել էր 2017 թվականի օգոստոսի 3–ին` այն ժամանակի մշակույթի նախարար Արմեն Ամիրյանի հրամանով։ -0-