Հայաստանը կքննարկի բարձր տեխնոլոգիական արտադրանքի արտահանման հնարավորությունը ԵՏՄ շրջանակներում. UITE

ԵՐԵՎԱՆ, 2 ապրիլի. /Նովոստի–Արմենիա/. Հայաստանը կքննարկի բարձր տեխնոլոգիական արտադրանքի արտահանման հնարավորությունը ԵՏՄ շրջանակներում, հինգշաբթի լրագրողներին ասաց Ինֆորմացիոն տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը։

Նրա խոսքերով` ԵՏՄ–ին Հայաստանի անդամակցությունից հետո ՏՏ ոլորտի իրավիճակն այնքան էլ չի փոխվել, քանի որ երկրից արտահանվող ՏՏ արտադրանքը միայն ծրագրային ապահովում է և չի բախվել մաքսային բարդությունների հետ։

UITE–ի ղեկավարը նաև ընդգծեց, որ ԵՏՄ–ին անդամակցելն ու մաքսային արգելքների վերացումը թույլ կտա հայկական ՏՏ ոլորտին շեշտը փոխել բարձր տեխնոլոգիական և ինժեներական արտադրանքի արտադրության ուղղությամբ։

«Հիմա մենք փորձում ենք լուծել բոլոր հարցերն ու արագացնել ընթացակարգերը` ԵՏՄ երկրների բարձր տեխնոլոգիական արտադրանքի արտահանման հնարավորությունը դիտարկելու համար», – ասաց Վարդանյանը։

Նրա խոսքերով` բարձր տեխնոլոգիաների ոլորտների և սարքավորումների արտադրության հաստատման և զարգացման դեպքում արագ մաքսային ձևակերպման հարցը չափազանց կարևոր է դառնում օպերատիվ մատակարարումներ, այդ թվում վճարումներ իրականացնելու, դրանց հիման վրա ծրագրային պրոդուկտների և արտահանման հաստատման համար։

2014 թ.–ի հունվարի 1–ի տվյալներով` Հայաստանում գրանցված է ՏՏ ոլորտում գործող ավելի քան 380 ընկերություն, որոնցից 159–ը օտարերկրյա կապիտալով են կամ օտարերկրյա խոշոր ընկերությունների ներկայացուցչություններ են։

Հայաստանի ՏՏ ոլորտն ամեն տարի ապահովում է մոտ 20–25 տոկոս աճ։ Հայաստանի ՀՆԱ–ում ՏՏ ոլորտի մասնաբաժինը կազմում է 3,8 տոկոս։ Ոլորտի զարգացման ռազմավարության համաձայն` 2018 թ.–ին նախատեսվում է ապահովել ՏՏ ոլորտի 1 մլրդ դոլարի շրջանառություն։–0–