Մասնագետները բոլոր ջանքերը գործադրում են Հայաստանի սեյսմիկ պաշտպանության մակարդակի բարձրացման համար. փորձագետ

ԵՐԵՎԱՆ, 5 դեկտեմբերի. /Նովոստի–Արմենիա/. Հայ մասնագետները գործադրում են բոլոր ջանքերը` երկրի սեյսմիկ պաշտպանության մակարդակի բարձրացման համար, ուրբաթ լրագրողներին ասաց Սեյսմիկ պաշտպանության ազգային ծառայության ղեկավար Հրաչյա Պետրոսյանը 1988 թ.–ին տեղի ունեցած Սպիտակի երկրաշարժի հերթական տարելիցին նվիրված մամուլի ասուլիսի ժամանակ։

«Անհրաժեշտ է անել ամեն ինչ, որպեսզի երկրաշարժը չվերածվի աղետի, այլ մնա բնական երևույթ», – ասաց Պետրոսյանն` ավելացնելով, որ հիմա Հայաստանն ավելի շատ է պատրաստ ուժեղ երկրաշարժի, քան 1988 թ.–ին։

Փորձագետն ընդգծեց, որ գոյություն ունեն սեյսմիկ պաշտպանության երեք գլխավոր բաղկացուցիչներ` սեյսմիկ վտանգի ճիշտ գնահատում, շենքերի և շինությունների սեյսմիկ անվտանգության ապահովում, բնակչության իրազեկում և ուսուցում։

«Հաշվի առնելով բոլոր բաղկացուցիչները` մենք սեյսմիկ պաշտպանության հարցերի ուսուցում ենք կազմակերպում։ Տարվա ընթացքում Հայաստանի և Արցախի տարածքում հանդիպումներ են կազմակերպվում տարբեր մասնագիտության և տարիքի մարդկանց հետ։ Ծրագրերը տարբեր են, և դրանք հրապարակվում են գերատեսչության կայքում», – ասաց Պետրոսյանը։

Նա նաև ավելացրեց, որ սեյսմիկ պաշտպանության ծառայությունը համալրվում է նոր սարքավորումներով։ «Վերջերս չեխ մասնագետների հետ համատեղ տեղադրվեց թեքությունը չափող սարք, որը ֆիքսում է տվյալները, որոնց համաձայն կարելի է ուսումնասիրել երկրագնդի կեղևի տեկտոնիկ շարժն ու ձևափոխությունը», – նշեց փորձագետը։

Պետրոսյանի խոսքերով` գործունեությունը վերսկսել է նաև «Այրիս» միջազգային սեյսմակայանը, որն աշխատում է 4–րդ սերնդի սարքավորումների հիման վրա, վերագործարկվել է Գառնիի աստղադիտարանի յուրօրինակ դեֆորմոգրաֆը։ «Ընթացիկ սեյսմիկ վտանգի գնահատմանն ուղղված միջոցառումներ են իրականացվում, այս պահին Հայաստանի և Արցախի տարածքում գործում է 150 գիտական կայան», – ասաց ծառայության ղեկավարը։

1988թ. դեկտեմբերի 7-ին Հայաստանում տեղի ունեցավ ավերիչ երկրաշարժ։ Աղետը  հիմնովին ավերեց Հայաստանի հյուսիսում գտնվող երկու քաղաք՝ Սպիտակն ու Լենինականը (այժմյան Գյումրին), ավելի քան հարյուր գյուղ։ Եվս մի քանի քաղաքներ ավերվեցին մասամբ։ Երկրաշարժի էպիկենտրոնում՝ Սպիտակ քաղաքում, նրա ուժգնությունը, գնահատելով 12-բալանոց սանդղակով, կախված շինությունների ավերվածության աստիճանից՝ հասել է 10 բալի, Լենինականում (Գյումրի)՝ 9 բալի, Կիրովականում (Վանաձոր)՝ 8 բալի։ Սպիտակ քաղաքն ավերվել էր հիմնովին: Այդ օրը, ըստ պաշտոնական տվյալների, զոհվեց 25 հազ. մարդ, 140 հազարը դարձան հաշմանդամներ, իսկ կես միլիոն մարդ մնաց անօթևան։-0–