«Սոյուզ» տիեզերանավի կապսուլան վայրէջք է կատարել Ղազախստանում

ԵՐԵՎԱՆ, 11 մարտի. /Նովոստի–Արմենիա/. «Սոյուզ ТМА-10М» տիեզերանավի կապսուլան, որով Միջազգային տիեզերակայանից (ՄՏԿ) Երկիր են վերադարձել Ռոսկոսմոսի տիեզերագնացներ Օլեգ Կոտովը և Սերգեյ Ռյազանսկին, ինչպես նաև աստղագետ Մայքլ Հոփքինսը, բարեհաջող վայրէջք է կատարել Ղազախստանում, հայտնել է Թռիչքների կառավարման կենտրոնի մեկնաբանը, որտեղից կատարվում է «Սոյուզի» և կապսուլայի վայրէջքի ուղիղ հեռարձակումը։

Անձնակազմը նորմալ է կատարել վայրէջքը, հայտնում է ԹԿԿ–ի մեկնաբանը` հղում անելով որոնողական–փրկարար ծառայության սպային։ «Սոյուզ» կապսուլայի վայրէջքն ապահովել են ինքնաթիռներ, Մի-8 ուղղաթիռներ, որոնողական–տարհանող մեքենաներ և Ռոսավիացիայի մի քանի միավոր օժանդակ տեխնիկա։

Որոշ ժամանակ անց տիեզերական ճանապարհորդներին կօգնեն դուրս գալ կապսուլայից։

Ավելի վաղ ասվում էր, թե իջեցվող կապսուլայի վայրէջքը կտեղափոխվի վայրէջքի կետում անբարենպաստ պայմանների պատճառով։ Սակայն Բայկոնուրի պետական հանձնաժողովը, հաշվի առնելով բոլոր «կողմ» և «դեմ» կարծիքները, որոշել է չփոխել վայրէջքի օրը, ժամը և վայրը, հաղորդում է ՌԻԱ Նովոստին։

Կոտովն ու Ռյազանսկին պատմության մեջ իրենց անունն են թողել որպես տիեզերագնացներ, ովքեր ՄՏԿ են դուրս բերել Օլիմպիական ջահը, որից հետագայում վառվել էր Սոչի-2014 ձմեռային խաղերի կրակը։ Բացի այդ, նրանք ռուսական սկաֆանդրներով բաց տիեզերքում աշխատանքի ռեկորդ են սահմանել` 8 ժամ 10 րոպե։

Նախքան մարտի 26–ին հաջորդ անձնակազմի` ՄՏԿ ժամանելը կայանում թռիչքը շարունակում են Ռոսկոսմոսի տիեզերագնաց Միխայիլ Տյուրինը, ՆԱՍԱ–ի աստղագետներ Ռիչարդ Մաստրակիոն և Մայքլ Հոփքինսը, ինչպես նաև ճապոնացի աստղագետ Կոիչի Վակատան։ -0-