Apple-ի համահիմնադիր Սթիվ Վոզնյակը Երևան կժամանի չորեքշաբթի երեկոյան

«Apple Computer» կորպորացիայի համահիմնադիր Սթիվ Վոզնյակը չորեքշաբթի երեկոյան կժամանի Երևան՝  «Համաշխարհային հեղինակություն տեղեկատվական տեխնոլոգիաների բանգավառում» ՀՀ նախագահի մրցանակ ստանալու համար, հայտնում է telecom.arka.am պորտալը՝ հղում անելով Synopsys-Armenia  ընկերության մամուլի ծառայությանը:

Այցի շրջանակներում ակնկալվում են Վոզնյակի հանդիպումները հայկական պետության ղեկավար Սերժ Սարգսյանի, վարչապետ Տիգրան Սարգսյանի, կառավարության անդամների, ուսանողների, գիտնականների հետ:

Նախատեսված են նաև Վոզնյակի մամուլի ասուլիսը և նրա պատվին Հայաստանի ազգային կամերային նվագախմբի համերգը:
Սթիվ Վոզնյակը և նրա կինը՝ Ջանեթ Վոզնյակը կմնան Հայաստանում մինչև նոյեմբերի 12-ը:

«ՏՏ ոլորտում համաշխարհային հեղինակություն» մրցանակը Հայաստանում հիմնվել է 2010 թվականին: Մրցանակի առաջին դափնեկիրն է «Intel» կորպորացիայի Տնօրենների խորհրդի նախագահ Քրեյգ Բարեթը:

Synopsys Inc ընկերությունը հայկական շուկա է մտել 2004 թվականի հոկտեմբերին՝ Leda Design և Monterey Arset ընկերությունների միաձռուլման պայմանագրի ստորագրումից հետո Synopsys Armenia ԲԲԸ մեկ միասնական ընկերությունում:
Synopsys-ն իր մասնաճյուղերն ունի աշխարհի 60 երկրում, Հյուսիսային Ամերիկայում, Եվրոպայում, Ճապոնիայում և Ասիայում, իսկ գլխամասային գրասենյակը գտնվում է Կալիֆորնիայում (ԱՄՆ): -0-