Կիբերխաղերի հինգերորդ բաց առաջնությունը կանցկացվի Հայաստանում հունիսի 22-26-ը
Կիբերխաղերի հինգերորդ բաց առաջնությունը կանցկացվի Հայաստանում հունիսի 22-26-ը, երկուշաբթի հայտարարեց Կիբերսպորտի ազգային պրոֆեսիոնալ լիգայի նախագահ Էդգար Սահակյանը «Նովոստի» միջազգային մամուլի կենտրոնում։
Հինգերորդ բաց առաջնությունն անցկացվում է որպես Հայաստանի մասնակցության ընտրական առաջնություն Հարավային Կորեայում դեկտեմբերի 8-11-ը կայանալիք Համաշխարհային Համակարգչային Խաղերի (WCG) եզրափակիչին։
«Առաջնությունն ավելի ընդլայնված կանցկացվի նախորդ տարիների համեմատ կիբերսպորտի ինչպես տեսակների թվով, այնպես էլ մրցանակների և գործընկերների թվով»,- ասաց Սահակյանը։
Ըստ նրա, այս տարի պաշտոնական խաղարկային խաղաձևեր են դարձել FIFA 2011 և StarCraft 2, իսկ ոչ պաշտոնական՝ Counter-Strike 1.6 և WarCraft 3 Dota, խաղարկային երկու պաշտոնական խաղաձևերի հաղթողները կմեկնեն Կորեա՝ մասնակցելու WCG-ի եզրափակիչին։
Նա նշեց, որ մասնակիցների գրանցումն անցկացվում է երկու փուլով, մասնավորապես, արդեն on-line ռեժիմով գրանցվել է 260 մարդ, ինչը 2,5 անգամ ավելի է 2010 թվականի մասնակիցների թվից, իսկ բոլոր ցանկացողները, ովքեր չեն հասցրել գրանցվել on-line ռեժիմով, կարող են գրանցվել հունիսի 22-ին off-line ռեժիմով։ Առաջնության ամենաերիտասարդ մասնկիցը 11 տարեկան է։
Ինչպես նշեց Կիբերլիգայի ղեկավարը, այս տարվա մրցանակային ֆոնդը կազմում է 3,6 միլիոն դրամ (շուրջ 9,6 հազ ԱՄՆ դոլար), ինչը երեք անգամ գերազանցում է նախորդ տարիների մրցանակային ֆոնդերի չափերը։ Միաժամանակ նյութական բոլոր մրցանակները Samsung ընկերության արտադրանքն են՝ մոնիտորներ, նոութբուքեր, նեթբուքեր։
«ԱրմենՏել» հեռահաղորդակցային ընկերության (Beeline ապրանքանիշ) գլխավոր տնօրեն Իգոր Կլիմկոյի խոսքով, ընկերությունն առաջին անգամ է հանդես գալիս որպես միջոցառման հովանավոր, քանի որ ընկերության կողմից ստեղծվել են Ինտերնետ որակյալ հասանելիության բոլոր նախադրյալները։
«Մենք շահագրգռված ենք այնպիսի նախագծերի աջակցությամբ, որոնք համեմատելի են Հայաստանի համակարգչային խաղերի ազգային առաջնության հետ, և կօժանդակենք հանրապետությունում կիբերսպորտի զարգացմանը, լինելով բիզնես հատվածի ներկայացուցիչներ, բավականին մեծ նշանակություն ենք տալիս համակարգչային տեխնոլոգիաների, Ինտերնետ հասանելիության, Համացանցի նկատմամբ երիտասարդության հետաքրքրության զարգացմանը»,- ասաց Կլիմկոն։
Բացի այդ, ինչպես կարծում է գլխավոր տնօրենը, համակարգչային խաղերը նպաստում են երեխաների զարգացմանը, մասնավորապես, ռազմավարական մտածելակերպին, բանակցություններ վարելու ընդունակությանը, քանի որ նրանցից շատերը հետագայում կաշխատեն ՏՏ ոլորտում։
Առաջնության ընթացքում «ԱրմենՏելը» կկազմակերպի համակարգչային խաղարկային սերվերի թեստավորում, որի միջոցով յուրաքանչյուր ցանկացող կարող է մրցույթից դուրս իր ուժերը փորձել Counter-Strike խաղում։
Առաջնության կազմակերպիչը Կիբերսպերտի ազգային պրոֆեսիոնալ լիգան է։ Համակարգչային խաղերի մրցաշարի համաշխարհային հովանավորն է Samsung ընկերությունը, Ազգային ընտրական փուլի գլխավոր հովանավորը՝ «ԱրմենՏել» ընկերությունը։ -0-
