Հայտնի է դարձել միգրենի անսպասելի պատճառը

ԵՐԵՎԱՆ, 24 հոկտեմբերի. /Նովոստի–Արմենիա/. Ամերիկացի գիտնականները պարզել են, որ միգրենով տառապողների բերանի խոռոչում ավելի շատ են նիտրատների վերամշակմանը մասնակցող բակտերիաները։ Դա խոսում է այն մասին, որ որոշ սննդամթերքներ ընդունակ են գլխացավեր առաջացնել։

Կալիֆոռնիայի և Չիկագոյի համալսարանների մասնագետները կարծում են, որ մարդու սննդակարգը և միգրենի զարգացման հավանականությունը շաղկապված են, գրում է The Guardian-ը։

Նրանք անցկացրել են միգրենի նոպաներով տառապող, բայց միաժամանակ քրոնիկ այլ հիվանդություններ չունեցող մարդկանց թքի և արտաթորանքի վերլուծություն։ Ստացված նմուշներում նիտրատների քայքայմանը մասնակցող բակտերիաների մակարդակն ավելի բարձր է եղել, քան միգրեն չունեցող մարդկանցից վերցրած նմուշներում։

Մարդու օրգանիզմում նիտրատները հայտնվում են մսի, որոշ բանջարեղենների (օրինակ, հազարաթերթիկի, լոլիկի), շոկոլադի և գինու օգտագործումից։

Միգրենին ծանոթ է յուրաքանչյուր յոթերորդ մարդը, ընդ որում` մեծամասնության մոտ նոպաները պատահում են ամսվա մեջ մեկ անգամից ավելի։ Ախտանիշները սովորաբար զարկող գլխացավն է, սրտխառնոցը, աչքի ցավը, թուլությունը։

Ոմանք նաև տեսողության մարում և ձայնային հալյուցինացիաներ են ունենում։ Միգրենի զարգացման գործոններին են պատկանում` սնվելու առանձնահատկությունները, սթրեսը, քնի և սեքսի պակասը, հորմոնալ ֆոնի խանգարումները։ Հայտնի է, որ կանայք երեք անգամ ավելի են տառապում այդ տեսակի գլխացավով, քան տղամարդիկ։



Գիտնականների կարծիքով, միգրենի պատճառ կարող են դառնալ նիտրատների տրոհման ընթացքում առաջացող ազոտի նիտրիտներն ու օքսիդները։ Այդ նյութերը լայնացնում են արյունատար անոթները և բարելավում արյան շրջանառությունը։ Սակայան բժիշկները, ստենոկարդիայի բուժման համար նիտրատ պարունակող դեղորայք նշանակելիս, նախազգուշացնում են հիվանդներին ուժեղ գլխացավերի առաջացման մասին։

Գիտնականները մտադիր են շարունակել ուսումնասիրությունները և պարզել, թե կոնկրետ որ սննդամթերքներն են ավելացնում միգրենի զարգացման հավանականությունը։ Դա թույլ կտա հետագայում մշակել բերանի խոռոչը ողողելու հեղուկ, որը կբալանսավորի բակտերիաների մակարդակը և կնվազեցնի այդ գլխացավի զարգացման ռիսկը։ -0-