Ղարաբաղյան հկամարտության կարգավորման հարցում լուրջ առաջընթաց մոտակա ամիսներին ակնկալել պետք չէ, կարծում է «Հայ Դատի» կենտրոնական գրասենյակի և ՀՅԴ քաղաքական հարցերով տնօրեն Կիրո Մանոյանը։
«Նախօրեին Ադրբեջանի նախագահ Իլհամ Ալիևը դարձյալ հայտարարել է զենքի ուժով ԼՂՀ-ն «ազատագրելու» պատրաստակամության մասին: Ալիևի նման դիրքորոշումը ենթադրելու հիմք է տալիս, որ ղարաբաղյան հարցում լուրջ առաջընթաց մոտակա ամիսներին ակնկալել պետք չէ»,- ասաց Մանոյանը հինգշաբթի մամուլի ասուլիսի ժամանակ՝ մեկնաբանելով ղարաբաղյան հիմնահարցի կարգավորման հնարավորությունը Մյունխենում ՀՀ և Ադրբեջանի նախագահների հանդիպման ընթացքում:
Երկու երկրների առաջնորդներ Սերժ Սարգսյանն ու Իլհամ Ալիևը շաբաթվա վերջին կհանդիպեն Մյունխենում և կքննարկեն Ղարաբաղյան հարցը:
Մանոյանի խոսքով՝ Ադրբեջանը երբեք չի հայտարարի, որ համաձայն է ԼՂՀ որևէ կարգավիճակի Ադրբեջանի սահմաններից դուրս, և եթե հայկական կողմի համար ԼՂՀ կարգավիճակի հարցը հիմնական խնդիրն է, ապա Ադրբեջանի համար այն վերջին տեղն է զբաղեցնում:
Մանոյանը նշեց, որ Լեռնային Ղարաբաղի կարգավիճակի հայտարարումը Ադրբեջանի սահմաններից դուրս այն նվազագույնն է, ինչին Ադրբեջանը կարող է գնալ, որից հետո հնարավոր կլինի խոսել տեղաշարժերի մասին ղարաբաղյան հարցում:
«Սակայն Ադրբեջանը երբեք նման հայտարարություններ չի անի: Սա հիմք է տալիս հաստատելու, որ մոտ ժամանակներս ոչ մի տեղաշարժ Ղարաբաղյան հարցում չի լինի»,- ասաց փորձագետը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
-0-
