Ղարաբաղյան հակամարտության կարգավորումը մինչև տարեվերջ անհնար է. փորձագետ

ԵՐԵՎԱՆ, 1 հուլիսի. /Նովոստի-Արմենիա/. Մինչև 2008 թ. վերջ ղարաբաղյան հակամարտության կարգավորում չի լինի, կարծում է հայ քաղաքագետ Սերգեյ Շաքարյանցը։

«Ղարաբաղյան հակամարտության մեջ երեք կողմ կա, և վերջնական որոշման դեպքում Լեռնային Ղարաբաղի իշխանությունների և ժողովրդի համաձայնությունը պարտադիր է», - երկուշաբթի լրագրողներին ասել է Շաքարյանցը։

Նրա խոսքերով, նման համաձայնություն լինել չի կարող, քանի որ Ադրբեջանն այսօր պատրաստ չէ զիջումների գնալ, մասնավորապես, Ղարաբաղի կարգավիճակի մասին հանրաքվեի հարցում։

«Այսօր խնդրի արագ և արդյունավետ կարգավորման սպասելն անիմաստ է», - նշել է Շաքարյանցը։

Փորձագետը նաև տարակուսանք է հայտնել՝ ԵԱՀԿ Մինսկի խմբի համանախագահների գործունեության կապակցությամբ։

Մասնավորապես, նրա խոսքերով, ամերիկացի համանախագահ Մեթյու Բրայզան, հայտարարելով շուտափույթ կարգավորման մասին, ցանկալին իրողության տեղն է ընդունում։

«Տարակուսանք է առաջացնում նաև ֆրանսիացի համանախագահ Բեռնար Ֆասիեի՝ Բաքվում զինվորական շքերթի մասնակցելը, որտեղ Ադրբեջանի նախագահը հանդես է եկել հերթական ռազմատենչ հայտարարություններով»,- նշել է Շաքարյանցը։

Հունիսի 26-ին՝ Բաքվում, Զինված ուժերի 90-ամյակի օրը, Ադրբեջանը բացեիբաց ցուցադրել է իր ռազմական հզորությունը։ Շքերթին ցուցադրվել է 210 միավոր արդիականացված ռազմական տեխնիկա, 19 ուղղաթիռ, 25 ինքնաթիռ, 31 նավ և մոտորանավ։

Փորձագետի խոսքերով, ֆրանսիացի համանախագահը ոչ մի կերպ չի մեկնաբանել այդ հայտարարությունները, ինչը տարօրինակ է՝ անաչառ միջնորդի համար։

Շաքարյանցը կարծում է, որ ստեղծված իրավիճակում հայկական կողմը պետք է կոշտ դիրք զբաղեցնի և «շատ բան պահանջի՝ գոնե կեսը ստանալու համար, այսինքն  այն, որ մենք զիջելու իրավունք չունենք»։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-