Հայաստանի վարչապետը չի բացառում զանգվածային անկարգությունների համար մեղադրվող անձանց համաներումը
Հայաստանի նորընտիր նախագահ, վարչապետ Սերժ Սարգսյանը հայտարարել է, որ Երևանում զանգվածային անկարգություներ կազմակերպելու և դրանց մասնակցելու համար կալանավորված անձանց համաներում շնորհելու քայլին կգնա՝ միայն այդ քայլի նպատակահարմարությունից ելնելով։
«Անհրաժեշտ է մանրամասն ուսումնասիրել իրավիճակը։ Եթե դրանից հետո ես եզրակացնեմ, որ դա անհրաժեշտ է, ապա, իհարկե, համաներում կհայտարարվի, հակառակ դեպքում՝ ոչ»,-ասաց Սարգսյանը չորեքշաբթի Ազգային ժողովում։
Փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։
Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է մեկ ոստիկան և յոթ քաղաքացի, ևս 230-ը վիրավորվել է։
Գլխավոր դատախազության տվյալներով, Հայաստանի Հատուկ քննչական ծառայության վարույթում գտնվող՝ անկարգությունների վերաբերյալ քրեական գործի շրջանակներում կալանավորվել է 106 մարդ։
Սարգսյանի խոսքերով, հանամերումը հասարակության գնահատականը ստանալու համար արված զուտ քաղաքական քայլ չի լինի ։ «Բոլոր իմ քայլերն ուղղված կլինեն միայն մեր երկրի զարգացմանը»,-ասաց վարչապետը։
Մեկնաբանելով մարտի 1-2-ի դեպքերը միջազգային հետաքննության ենթարկելու վերաբերյալ ընդդիմության հայտարարությունը՝ կառավարության ղեկավարը հայտնեց, որ օտարերկրյա փորձագետների Հայաստան ժամանումը և միջազգային հանձնաժողովի ստեղծումը ՄԱԿ-ի կանոնակարգով նախատեսված արարողակարգ է։
«Եթե դուք ծանոթանաք այդ արարողակարգին, ապա կարող եք գնահատել նման քայլի նպատակահարմարությունը»,-ասաց վարչապետը։ Ընդ որում նա ավելացրեց, որ Հայաստանում ինքը քաղբանտարկյալներ չգիտի։-0-
