Ֆրանսիան հետ է կանչել Ադրբեջանում իր դեսպանին՝ Բաքվին մեղադրելով միակողմանի գործողությունների մեջ

ԵՐԵՎԱՆ, 17 ապրիլի․/Նովոստի–Արմենիա/. Պաշտոնական Փարիզը հայտարարում է, որ հետ է կանչել Ադրբեջանում Ֆրանսիայի դեսպանին՝ խորհրդակցությունների նպատակով։

Ֆրանսիայի ԱԳՆ-ի հաղորդագրության համաձայն՝ որոշման պատճառը «Ադրբեջանի միակողմանի գործողություններն են, որոնք վնաս են հասցրել երկու երկրների միջև հարաբերություններին», հայտնում է «Ազատություն» ռ/կ–ն։

Ֆրանսիական կողմը մանրամասներ չի հայտնում։

Ֆրանսիայի դիվանագիտական գերատեսչությունը նշում է, որ այդ կապակցությամբ այսօր դեսպան Անն Բուայոնին ընդունել է նախագահ Էմանյուել Մակրոնը։

«Նա {Էմանյուել Մակրոնը} ափսոսանք է հայտնել Ադրբեջանի գործողությունների կապակցությամբ և ցանկություն հայտնել լսելու ադրբեջանական կողմի պարզաբանումը», - ասված է հաղորդագրությունում։

Ֆրանսիայի ԱԳՆ -ն հավելում է, որ Ֆրանսիան վերահաստատում է իր աջակցությունն Ադրբեջանի և Հայաստանի միջև հարաբերությունների կարգավորմանը՝ միաժամանակ հարգելով միջազգային իրավունքը և երկու երկրների տարածքային ամբողջականությունը։