Թեհրանի ահաբեկչությունը կհանգեցնի իրանցիների աննախադեպ քաղաքական համախմբման. փորձագետ

ԵՐԵՎԱՆ, 8 հունիսի. /Նովոստի-Արմենիա/. Թեհրանի ահաբեկչությունը կհանգեցնի իրանցիների բարձր մակարդակի հասարակական և քաղաքական համախմբման,  այս մասին իր Facebook-յան էջում գրել է իրանագետ Վարդան Ոսկանյանը:

Իրանի մայրաքաղաքի վրա երկու հարձակումները տեղի են ունեցել չորեքշաբթի` հունիսի 7-ին: Ավտոմատներով զինված մարդկանց խումբը ներխուժել է մեջլիսի շենք և կրակ  է բացել այնտեղ գտնվող մարդկանց ուղղությամբ: Դրամից անմիջապես հետո մի քանի հանցագործներ գրոհել են իմամ Խոմեինիի դամբարանը, որ գտնվում է մեջլիսի շենքից 20 կմ հեռավորության վրա: Թեհրանում երկու հարձակումների հետևանքով զոհերի թիվը, վերջին տվյալներով, հասել է 13-ի, իսկ վիրավորների թիվը` 43-ի:

Իրանագետի խոսքերով, ակնհայտ է, որ Թեհրանում տեղի ունեցած վերջին ահաբեկչական հարձակումները նպատակ են հետապնդում նաև հավասարակշռությունից հանելու Իրանը և այս երկիրը ներքաշելու հապշտապ գործողությունների մեջ, որտեղ սխալվելու հավանականությունը չափազանց մեծ է լինելու:

Նրա կարծիքով, ասվածի ապացույց կարող է լինել իրանցիների համար նաև բարոյական դաշտում այնպիսի զգայուն կետին ահաբեկչական հարված հասցնելը, ինչպիսին Իսլամական Հանրապետության հիմնադիր և շիայական պետական կառավարման մոդելի ճարտարապետ Իմամ Խոմեինիի դամբարանի տարածքն է:

 «Ակնհայտ է, որ նման ծրագրավորում իրականացնողները չեն հաշվարկել կարևոր մի հանգամանք. «յոթը չափիր, մեկը կտրիր» իմաստնությունը լավագույնն է բնորոշում իրանցիրների գործելաոճը գրեթե ամեն ինչում, հետևաբար Իրանից զգացական, հապճեպ և սխալաշատ պատասխաններ ակնկալելն առնվազն անհեռատեսություն է»,- նշել է Ոսկանյանը:

Քաղաքագետի կարծիքով, սխալ է հաշվարկված նաև ահաբեկչության միջոցով Իրանի ներսում խուճապային տրամադրություններ և ներկա վարչակարգի նկատմամբ անվստահություն սերմանելու բաղադրիչը։ 

«Ընդհակառակը՝ նկատվում է բոլորովին հակառակ գործընթաց, որն ի վերջո հանգեցնելու է իրանցիների շրջանում քաղաքական և հասարակական համախմբման աննախադեպ բարձր մակարդակի, ինչը հնարավորություն է ընձեռելու իրանական ռազմաքաղաքական վերնախավին ներազգային համերաշխության պայմաններում հանգիստ և վստահորեն ծրագրավորելու պատասխան բոլոր գործողությունները»,-ասել է Ոսկանյանը:

«Իսլամական պետություն» խմբավորումն իր վրա է վերցրել երկու հարձակումների պատասխանատվությունը:  -0-