2011թ.-ի առաջին կիսամյակում Լեռնային Ղարաբաղի Հանրապետությունում 178 հանցագործություն է գրանցվել՝ 2010թ.-ի նույն ժամանակահատվածի 214-ի դիմաց, չորեքշաբթի Ստեփանակերտում հրավիրված ասուլիսի ժամանակ հայտնել է ԼՂՀ գլխավոր դատախազ Արշավիր Ղարամյանը։
Ըստ նրա, գրանցված հանցագործությունների թիվը նվազել է 36 դեպքով կամ 16,8 տոկոսով։
«Ընթացիկ տարվա հունվար-հունիս ամիսներին գրանցվել է միջին ծանրության 36 հանցագործություն ՝ 2010թ.-ի նույն ժամանակահատվածի 44-ի դիմաց, 76 ծանր և 3 առանձնապես ծանր հանցագործություն՝ 2010թ.-ի վեց ամիսների ընթացքում գրանցված 83 և 6 դեպքերի դիմաց»,- նշել է Ղարամյանը։
ԼՂՀ գլխավոր դատախազը տեղեկացրել է, որ նշված ժամանակահատվածում անձի դեմ կատարված հանցագործության 19 դեպք է գրանցվել՝ 2010թ.-ի առաջին կիսամյակի 26-ի փոխարեն, որոնցից երեքը սպանություն է եղել (4-ը՝ 2010թ.-ի հունվար-հունիս ամսին), սպանության փորձեր չեն գրանցվել։ 2010թ.-ին գրանցված՝ սեփականության դեմ իրականացված հանցագործության 110 դեպքի փոխարեն 104 հանցագործություն է գրանցվել, տնտեսական գործունեության դեմ՝ 6 (2010թ.-ի 10-ի փոխարեն)։
«Առողջությանը դիտավորյալ վնաս պատճառելու դեպքերն ավելի քան կրկնակի անգամ նվազել են՝ կազմելով 2՝ 5-ի փոխարեն, ընդ որում առողջությանը ծանր վնաս պատճառելու դեպքեր չեն գրանցվել, անցած տարվա նույն ժամանակահատվածի տվյալ ցուցանիշը կազմել է երեք դեպք։ Սեռական անձեռնմխելիության դեմ ուղղված հանցագործությունները մեկ դեպքով ավելացել են՝ 6-ի փոխարեն 7»,- ասել է Ղարամյանը։
ԼՂՀ գլխավոր դատախազը նաև տեղեկացրել է, որ այսօր կայացել է ԼՂՀ դատախազության կոլեգիայի նիստը, որի ընթացքում քննարկվել է հանրապետության դատախազության՝ 2011թ.-ի առաջին կիսամյակում իրականացրած գործունեությունը, հաստատվել է Ղարաբաղի գլխավոր դատախազության աշխատանքային ծրագիրը ընթացիկ տարվա երկրորդ կիսամյակի համար , ինչպես նաև տեղի է ունեցել ԼՂՀ շրջանային դատախազությունների նորանշանակ դատախազների երդման արարողությունը։ -0-
