Նախորդ շաբաթվա ընթացքում Ղարաբաղի և Ադրբեջանի ԶՈՒ շփման գծում իրավիճակն անհանգիստ էր. ԼՂՀ ՊՆ

Հոկտեմբերի 24-30-ն ընկած ժամանակահատվածում ադրբեջանական բանակի առաջապահ ստորաբաժանումները տարբեր տրամաչափի հրաձգային զինատեսակներից հրադադարի պահպանման ռեժիմը խախտել են ավելի քան 165 անգամ:

Առավել ինտենսիվ կրակահերթեր են արձանագրվել շփման գոտու Հադրութի և Մարտակերտի պաշտպանական ուղղություններում, որոնց հետևանքով հակառակորդի դավադիր գնդակից հոկտեմբերի 26-ին ժամը 16:45-ի  սահմաններում  հյուսիսարևելյան ուղղությամբ տեղակայված դիրքերից մեկում զոհվել է Հարութ Աշոտի Գրիգորյանը:

Հատկանշական է, որ դարանակալ թշնամու սադրիչ գործողությունը տեղի է ունեցել շփման գծում ԵԱՀԿ առաքելության մոնիտորինգի անցկացումից ընդամենը ժամեր անց, ինչը ևս մեկ անգամ վկայում է իրադրության ապակայունացմանն ուղղված  պաշտոնական Բաքվի ոչ կառուցողական մոտեցման մասին:

Ասվածի մասին է փաստում նաև վերջին շրջանում հակառակորդի կողմից հրադադարի պահպանման ռեժիմի խախտման վիճակագրությունը: Միայն հոկտեմբեր ամսվա ընթացքում ադրբեջանական զինուժը  «АК»,  «СВД», «ПК»,  «ДШК», «РПК», «УТЁС»  և «Սև նետ»  հրաձգային զինատեսակներից հրադադարը խախտել է շուրջ 750 անգամ` ընդհանուր առմամբ արձակելով ավելի քան 7000 կրակոց:

«Այսքանից կարելի է, թերևս, միայն մեկ հետևություն անել՝  Ադրբեջանի պաշտոնական և ոչ պաշտոնական քարոզչամիջոցներով տարածվող այն լուրերն ու տեղեկությունները, թե իբր հակամարտ զորքերի շփման գծում հայկական ուժերի կողմից պարբերաբար խախտվում է հրադադարի պահպանման ռեժիմը, ոչ այլ ինչ է, քան միջազգային հանրությանը մոլորեցնելու նպատակային ապատեղեկատվություն», - նշվում է տեղեկատվության մեջ:

«Ինչ վերաբերում է հակառակորդի կողմից պարբերաբար իրականացվող սադրանքների չեզոքացմանն ուղղված ՊԲ գործողություններին, ապա դրանք կրում են համակարգված և նպատակային բնույթ, ինչը հնարավորություն է տալիս ոչ միայն անհրաժեշտության դեպքում ճնշել ադրբեջանական դիրքապահների ագրեսիվությունը, այլև առաջնային գծում մշտապես լինել թելադրողի դերում», - նշվում է ԼՂՀ ՊՆ տեղեկատվության մեջ:-0-