ԵՐԵՎԱՆ, 12 դեկտեմբերի./Նովոստի–Արմենիա/. Ադրբեջանական ուժերի հարձակումը Հին Թաղեր-Խծաբերդ ուղղությամբ պետք է արժանանա առաջին հերթին ՌԴ խաղաղապահների արձագանքին:
Այս մասին գրել է ՀՀ վարչապետի մամուլի խոսնակ Մանե Գևորգյանը Facebook–յան իր էջում։
«Վաղ առավոտից զարգացող իրադարձությունների մասին խաղաղապահների ղեկավարությունը լիարժեք տեղեկացված է», – նշել է Գևորգյանը:
Հիշեցնենք, որ քիչ առաջ ՀՀ ՊՆ–ն
հայտնեց, որ այսօր ադրբեջանական կողմը վերսկսել է հարձակողական գործողությունները Արցախի Հանրապետության Հին Թաղլար և Խծաբերդ բնակավայրերի ուղղությամբ։ ՊԲ ստորաբաժանումները ձեռնարկում են համարժեք միջոցառումներ:
Այսօր առավոտյան Արցախի ՊԲ–ն
հերքել էր ադրբեջանական լրատվամիջոցներում տարածված տեղեկատվությունն առ այն, թե իբր Հադրութի հատվածում հայկական ուժերը դիմել են զինված սադրանքի, ինչի արդյունքում մեկ ադրբեջանցի զինծառայող է վիրավորվել։
Արցախի ՊԲ–ից տեղեկացրեցին, որ դեկտեմբերի 11-ին՝ ժամը 20:40-ի սահմաններում, ՊԲ հարավային ուղղությամբ տեղակայված մարտական դիրքերից մեկի ուղղությամբ հակառակորդը ձեռնարկել է հարձակման փորձ: Ծավալված փոխհրաձգության հետևանքով տարբեր աստիճանների հրազենային վիրավորումներ են ստացել երեք պահեստազորայիններ: Նրանց կյանքին վտանգ չի սպառնում։
Ավելի վաղ (Արցախում ռազմական գործողությունների ավարտից հետո, խմբգր.) հաղորդվում էր, որ հենց այս երկու գյուղերն են մնացել հայկական կողմի վերահսկողության տակ, բայց դրանք կտրված են Հադրութի շրջանի հիմնական տարածքից, որը փոխանցվել է Ադրբեջանի վերահսկողության տակ նոյեմբերի 9–ին ստորագրված եռակողմ հայտարարության արդյունքում։–0–