Ադրբեջանական ԶՈւ-ն Արցախի հարավում մարտական դիրքերից մեկի վրա հարձակման փորձ է ձեռնարկել. եղել է փոխհրաձգություն. կան վիրավորներ (ՄԱՆՐԱՄԱՍՆԵՐ)

ԵՐԵՎԱՆ, 12 դեկտեմբերի./Նովոստի-Արմենիա/. Ադրբեջանական լրատվամիջոցներում տարածված տեղեկատվությունն առ այն, թե իբր Հադրութի հատվածում հայկական ուժերը դիմել են զինված սադրանքի, ինչի արդյունքում մեկ ադրբեջանցի զինծառայող է վիրավորվել, իրականությանը չի համապատասխանում, հաղորդվում է ՊԲ Facebook-յան էջում:

«Իրականությունն այն է, որ դեկտեմբերի 11-ին՝ ժամը 20:40-ի սահմաններում, ՊԲ հարավային ուղղությամբ տեղակայված մարտական դիրքերից մեկի ուղղությամբ հակառակորդը ձեռնարկել է հարձակման փորձ: Ծավալված փոխհրաձգության հետևանքով տարբեր աստիճանների հրազենային վիրավորումներ են ստացել երեք պահեստազորայիններ: Նրանց կյանքին վտանգ չի սպառնում»,- նշվում է հաղորդագրության մեջ:

Նշվում է, որ դեպքի մանրամասները պարզելու համար կատարվում է քննություն:-0-