Վերցրել է հեռախոսներն ու վարկեր ձևակերպել. 26-ամյա անձը շուրջ 15 անձից խաբեությամբ 15 մլն դրամ է կորզել
ԵՐԵՎԱՆ, 29 սեպտեմբերի․ /Նովոստի-Արմենիա/․ Իջևան քաղաքի բնակիչ 26-ամյա մի երիտասարդ 2023 թ.-ից մինչ օրս այլ անձանց բջջային հեռախոսներով և նրանց անվամբ ձևակերպել էր մոտ 15 մլն դրամի վարկեր։
Այս մասին հայտնում է ՆԳՆ ոստիկանությունը։
Գերատեսչության տեղեկացմամբ, սեպտեմբերի սկզբին Քրեական ոստիկանության Տավուշի մարզային վարչության ծառայողները ստացել էին օպերատիվ տեղեկություն, որ երիտասարդը չարաշահելով մարդկանց վստահությունը, շուրջ 15 անձից վերցրել է բջջային հեռախոսները, նրանց անվամբ ձևակերպել վարկեր և ստացած ընդհանուր մոտ 15 մլն դրամն օգտագործել անձնական կարիքների համար։
Բացատրական աշխատանքի արդյունքում երիտասարդը խոստովանել է արարքը։
Ոստիկանությունը պարզել է նաև, որ խարդախության զոհ դարձածների մեծ մասն անգամ տեղյակ չէր, որ իր անունով ձևակերպված վարկ կա։
Կազմված փաստաթղթերը ներկայացվել են Տավուշի մարզային քննչական վարչություն։ Խարդախության հատկանիշներով նախաձեռնվել է քրեական վարույթ։
Հանգամանքները պարզվում են։
