ԵՐԵՎԱՆ, 31 հուլիսի./Նովոստի-Արմենիա/. Սոցցանցերի հայկական սեգմենտում իսկական սկանդալ է հասունացել պոռնոգրաֆիկ տեսանյութի հրապարակումից հետո, որը նկարահանվել է «Էրեբունի» պատմահնագիտական արգելոց-թանգարանի տարածքում:
Արգելոց-թանգարանի տնօրեն Միքայել Բադալյանը Facebook-յան իր էջում գրել է, որ ուրբաթ է տեղեկացել Էրեբունի ամրոցում նկարահանվածի մասին։
«Մինչև համապատասխան իրավապահ մարմինների կողմից չլինի մանրամասն քննություն, ես չեմ կարող ամբողջական գնահատական տալ տեղի ունեցածին», - նշել է Բադալյանը:
Նրա խոսքով, նկարել են ոչ շուտ, քան հունիսի 24-ը, քանի որ այդ օրվանից սկսվել են Էրեբունի հնավայրում իրականացվող պեղումները, իսկ այդ նյութի մեջ պեղումների արդյունքում հանված հող չկա։
«Ակնհայտ է, որ ամրոց այցելել են նախապես ծրագրված և ոչ երկու հոգով։ Էրեբունի ամրոցը զբաղեցնում է ահռելի տարածք և մեկ ոստիկանը չի կարող վերահսկել ամբողջ տարածքը։ Մենք դիմել ենք Երևանի քաղաքապետարան՝ ՀՀ Ոստիկանություն դիմելու և ծառայողական քննություն սկսելու, իսկ այսպես կոչված մասնակիցներին բացահայտելու և օրենքի խստությամբ պատժելու համար», - գրել է Բադալյանը:
Նա նաև նշել է, որ որոշ ուժեր փորձել են տեսանյութն օգտագործել իր դեմ, ինչին նա չի համաձայնվել՝ նշելով, որ «ոչ կուսակցական է, ոչ ընդդիմադիր և ոչ էլ դիմադիր»:
«Անկախ այն հանգամանքից, որ Էրեբունի ամրոցի և թանգարանի պահպանությունը իրականացվում է ՀՀ Ոստիկանության վերը նշված ծառայության կողմից և կարելի կլիներ մեղքը հանգիստ բարդել նրանց վրա, նշեմ, որ այս ամենի առաջին պատասխանատուն ես եմ և եթե վերադաս մարմինը կգտնի, որ ես պետք է հրաժարական տամ իմ զբաղեցրած պաշտոնից , ապա ես անվերապահորեն կկատարեմ դա», - գրել է Բադալյանը:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
