Գյումրու փողոցներից մեկում մի քանի ժամ առաջ ծնված նորածին է հայտնաբերվել.ՄԱՆՐԱՄԱՍՆԵՐ

ԵՐԵՎԱՆ, 4 հուլիսի./Նովոստի–Արմենիա/. Գյումրու «Ավտոկայան» թաղամասում նախօրեին հայտնաբերվել է նորածին տղա երեխա: 

Այս մասին հայտնում է «Արմենպրես»–ը` հղում անելով  ՀՀ  ոստիկանությանը։

Լքված  երեխայի մասին ահազանգը ստացվել է հուլիսի 3-ին՝ ժամը 10:10-ին:  Երեխան  հայտնաբերվել է Շահումյան փողոցում՝ ավտոկայանի մերձակայքում: Մեկնել է օպերատիվ քննչական խումբ:

Ըստ տեղեկությունների՝ տան պարիսպի տակ երեխային նկատել է պատահական անցորդը, նա  լսել է երեխայի ձայնը, մոտեցել   ու  անմիջապես   ահազանգել ոստիկանություն ու  շտապօգնություն: Նորածինը շտապ օգնության մեքենայով տեղափոխվել է Գյումրու «Մոր ու մանկան ավստրիական հիվանդանոց»: 

Բնածին  արատ  երեխայի մոտ չի հայտնաբերվել:

«Ունեցել է սրտի տոների հազվականություն, ցածր ճնշում:  Եղել է կապտակարմրավուն երանգով: Երեխան հասուն  նորածին է՝ մի քանի ժամ առաջ ծնված», – ասել է հիվանդանոցի վերակենդանացման բաժնի բժշկուհի Մարգարիտա Հարությունյանը՝ հավելելով, որ թեև երեխան արատ չունի, բայց ունի բուժման կարիք:  Երեխան փաթաթված է եղել բարակ ծածկոցով ու մեկ տակաշորով,  կեղտոտ ու  անխնամ:

Հիվանդանոցում անմիջապես կազմակերպվել է երեխայի համապատասխան բուժզննումն ու հետազոտությունները: «Երեխան կմնա վերակենդանացման բաժանմունքում՝  տաքացնող սեղանիկի վրա այնքան  մինչև իրավիճակը կարգավորվի: Կլինի բժիշկների հսկողության տակ»,- նշել է Մարգարիտա Հարությունյանը:

Tert.am–ի հաղորդմամբ, փոքրիկն ամենաշատը 6 ժամ առաջ է ծնվել, պորտալարը դեռ թաց է։–0–