«Դոլմամա» ռեստորանի տանիքում բռնկված հրդեհը մարվել է, հայտնի են հետևանքները (ՎԻԴԵՈ)

ԵՐԵՎԱՆ, 21 նոյեմբերի./Նովոստի–Արմենիա/. Այսօր «Դոլմամա» ռեստորանի տանիքում բռնկված հրդեհը մարվել է, հաղորդում է ՀՀ ԱԻՆ Փրկարար ծառայությունը։

Հիշեցնենք, որ այսօր` նոյեմբերի 21-ին, ժամը 13:59-ին «911» ծառայություն ահազանգ է ստացվել, որ Երևանի Աբովյան և Պուշկինի փողոցների խաչմերուկում՝ երկհարկանի շինության տանիքում,հրդեհ է բռնկվել:

Հրդեհի բարդության «1-ԲԻՍ» կանչով դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ, ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը, ինչպես նաև հոգեբանական աջակցության բաժնի հոգեբանական խորհրդատվության գծով հրահանգիչը:

Ժամը 14:10-ին հայտարարվել է հրդեհի բարդության «Թիվ-2» աստիճան:

Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս երկու մարտական հաշվարկ և մեկ ավտոսանդուղք:

Ժամը 14:19-ին հրդեհի բարդության աստիճանը բարձրացվել է «Թիվ-3» կանչի:

Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս չորս մարտական հաշվարկ և մեկ ավտոսանդուղք:

Պարզվել է, որ հրդեհը բռնկվել է Աբովյան 10 հասցեում գտնվող ռեստորանի տանիքում: Այրվում են տանիքի փայտյա կառուցատարրերը: 

Ժամը 15:00-ի դրությամբ վերոնշյալ հասցեում հրդեհաշիջման աշխատանքներ են իրականացնում 10 մարտական հաշվարկ և երկու ավտոսանդուղք:

Դեպքի վայրում է գտնվել ԱԻ նախարար Ֆելիքս Ցոլակյանը:

Ժամը 16:08-ին հրդեհը մեկուսացվել է, 17:00-ին՝ մարվել: Հրդեհի հետևանքով այրվել է Աբովյան 10 հասցեում գտնվող ռեստորանի տանիքը՝ ամբողջությամբ (650 քմ), 2-րդ հարկի մոտ 350 քմ հատվածը, ինչպես նաև Պուշկինի 10 հասցեում գտնվող շինության փայտյա կառուցատարրերը՝ մոտ 5 քմ:–0–