Դաժան սպանություն Երևանում. 33–ամյա տղամարդը շենքի մուտքի մոտ դանակի ավելի քան 10 հարվածով սպանել է 34–ամյա կնոջը

ԵՐԵՎԱՆ, 11 օգոստոսի./Նովոստի–Արմենիա/. Այսօր, օգոստոսի 11-ին, առանձնակի դաժանությամբ սպանություն է տեղի ունեցել Երևանում։

Shamshyan.com–ի հաղորդմամբ, ժամը 09։20-ի սահմաններում ոստիկանության Շենգավիթի բաժին ահազանգ է ստացվել, որ Արտաշիսյան 54 շենքի մուտքերից մեկում կնոջ դի կա։

Ոստիկաններն ու քննիչները նշված շենքի առաջին մուտքում հայտնաբերել են նույն շենքի բնակարաններից մեկի բնակիչ 34-ամյա Մերի Մ․-ի դին։

Դատաբժշկի նախնական եզրակացության համաձայն՝ դիակի վրա կան մոտ 10-ից ավելի դանակի հարվածի հետքեր։

Ոստիկաններն ու քննիչները տաք հետքերով պարզել են, որ նրան սպանել է Երևանի բնակիչ 33-ամյա Մհեր Զ․-ն։

Մհեր Զ․-ն ինքնակամ ներկայացրել է ոստիկանություն և հայտնել, որ սպանությունը կատարել է ինքը ու ներկայացրել է նաև հանցագործության գործիք դանակը։

Փաստի առթիվ հարուցվել է քրեական գործ ՀՀ ՔրՕրի 104 հոդվածի 1-ի մասի հատկանիշներով (սպանություն)։

Քննիչի որոշմամբ՝ նշանակվել են մի շարք փորձաքննություններ, այդ թվում՝ դիակի դատաբժշկական։–0–