4 քաղաքացու վիճաբանության հետևանքով 1 մարդու դի տեղափոխվել է հիվանդանոց, կան վիրավորներ

ԵՐԵՎԱՆ, 9 սեպտեմբերի. /Նովոստի-Արմենիա/. Սեպտեմբերի 3-ին Գառնի գյուղի բուժկենտրոն է տեղափոխվել Երևան քաղաքի բնակիչ, 47-ամյա Արմեն Մեհրաբյանը մահացած վիճակում:

Ինչպես հայտնում է shamshyan.com կայքը, Հայաստանի քննչական կոմիտեի Կոտայքի մարզային քննչական վարչության Աբովյանի քննչական բաժնում նյութեր են նախապատրաստվում Մեհրաբյանի մահվան փաստով:

Ինչպես հայտնում է ֆոտոլրագրող Գագիկ Շամշյանը, այդ օրը նշված բուժկենտրոն է տեղափոխվել Ա. Մեհրաբյանը՝ «ձախ ականջի հետնամասում կապտուկի առկայությամբ» ախտանիշով:

Նույն օրը, ժամը 23:30-ի սահմաններում Սուրբ Գրիգոր Լուսավորիչ բժշկական կենտրոն է տեղափոխվել Երևան քաղաքի բնակիչ, 30-ամյա Վահե Հովակիմյանը: Վերջինս հիվանդանոց մեկնած Ոստիկանության Նոր Նորքի բաժնի ծառայողներին հայտնել է, որ վնասվածքը ստացել է Գառնիում՝ վայր ընկնելու հետևանքով:


Կայքի հաղորդմամբ, Վ. Հովակիմյանը, Ա. Մեհրաբյանը և ևս 2 մարդ Գառնու ձորում կենցաղային հարցի շուրջ վիճաբանել են միմյանց հետ, որից հետո Ա. Մեհրաբյանը տեղափոխվել է Գառնի գյուղի բուժկենտրոն՝ մահացած վիճակում, իսկ Վ. Հովակիմյանն էլ ժամեր անց՝ Սուրբ Գրիգոր Լուսավորիչ բժշկական կենտրոն:

Փաստի առթիվ ստեղծվել է քննչական խումբ՝ դեպքի հանգամանքները ամբողջովին բացահայտելու, մյուս անձանց հայտնաբերելու և Ա. Մեհրաբյանի մահվան հանգամանքները պարզելու ուղղությամբ:

Նշանակվել է դիակի դատաբժշկական փորձաքննություն: -0-