100կգ մեղր, մեքենա և որսորդական հրացաններ. էլ ի՞նչ է պետք գողին «երջանկության» համար (ՎԻԴԵՈ)
16:09
22 Մարտի 2022
ԵՐԵՎԱՆ, 22 մարտի./Նովոստի–Արմենիա/. Գողության դեպք է բացահայտվել Արմավիր քաղաքում։
Ոստիկանության հաղորդմամբ, գողության մասին հաղորդումը ոստիկանության Արմավիրի բաժնում մոտ մեկ ամիս առաջ էր ստացվել: Արմավիր քաղաքի Լերմոնտովի փողոցի տներից մեկին կից ավտոտնակից գողացել էին «Տոյոտա Պրադո» մակնիշի մեքենա, մեղրով 20 լիտրանոց չորս ալյումինե տարա և որսորդական երկփողանի հրացաններ: Տանտերերն արտասահմանում էին:
Առանձնատանը հետևող հարազատներն էին պարզել եղելությունն ու փետրվարի 22-ին ոստիկանություն դիմել:
Загружается новость ... "Лево"
Գողության փաստով Արմավիրի մարզային քննչական վարչությունում հարուցվեց քրեական գործ:
«Արմավիրի բաժնի քրեական հետախույզների և ոստիկանության Արմավիրի մարզային վարչության փորձաքրեագիտական խմբի հետևողական աշխատանքի արդյունքում տեղեկություններ ստացվեցին, որ գողությունը հնարավոր է կատարած լինի Արմավիր քաղաքի Ավետիսյան փողոցի 44-ամյա մի բնակիչ», – նշվում է գերատեսչության հաղորդագրության մեջ:
Մարտի 16-ին կասկածվողը բերման ենթարկվեց ոստիկանության Արմավիրի բաժին:
Ավելի ուշ 44-ամյա տղամարդը ներկայացվեց նախաքննական մարմնին: Հանցավոր արարքը հիմնավորելու հարցում առանցքային նշանակություն ունեցան փորձագիտական ուսումնասիրությունները. մատնահետքերը նույնական էին ավտոտնակից վերցված մատնահետքերի հետ:
Դատարանի որոշմամբ նրա տանը և կից օժանդակ շինություններում խուզարկություն կատարվեց: Նկուղից հայտնաբերվեց ծաղկամանում աճեցված կանեփի 2 բույս, 3 լիտրանոց ապակյա տարայով մոտ 180 գրամ կանաչավուն, չորացված, մանրացված կանեփանման զանգված, 10 լիտր տարողությամբ մեղրով ապակյա տարա, 2 ալյումինե տարա, որոնցից մեկի մեջ մեղր էր եղել, իսկ տան հետնամասում հայտնաբերվեց պարկ՝ կանեփի նմանվող զանգվածով:
Խուզարկություն կատարվեց նաև կասկածյալի զոքանչի բնակարանում, որտեղ հայտնաբերվեցին մեղրով ալյումինե և ապակյա տարաներ: Պարզվեց, որ մեղրը տանտիրուհուն փեսան էր բերել:
Ձեռնարկվում են միջոցառումներ՝ ավտոմեքենան ու հրացանները հայտնաբերելու ուղղությամբ:
44-ամյա տղամարդը կալանավորվել է։ Հանգամանքները նախաքննությամբ պարզվում են:–0–