ԵՐԵՎԱՆ, 24 դեկտեմբերի. /Նովոստի-Արմենիա/. Facebook սոցցանցի հայկական սեգմենտի օգտատերերը վերջին օրերին ակտիվորեն քննարկում են Երևանի փողոցներում կայանված մեքենաների անիվների գողացման դեպքերը:
Ժամեր առաջ Ashot Sargsyan տվյալներով Facebook-ի օգտատերը իր էջում առանց անիվների մեքենայի լուսանկար է հրապարակել` նշելով, որ առավոտը բարի չէր հարևանի համար։ Օգտատիրոջ ներկայացրածով մեքենայի անիվները գողացել են։
«Առավոտը բարի չեր հարևանիս համար, մի քանի օր առաջ նույնը արել են մեկ այլ հարևանի մեքենայի հետ», - նշել է նա:
Օգտատերը նշել է նաև, որ նման տեսարանների կարող ենք հանդիպել քաղաքի տարբեր բակերում: Նա նաև կոչ է արել ոստիկանությանը վերջ տալ այս վիճակին և թույլ չտալ ամենաթողությանը:
Ոստիկանության արձագանքը
Ոստիկանության մամուլի ծառայությունը պաշտոնական հաղորդագրություն է տարածել, ըստ որի ոստիկանությունում նշված մեքենայի անիվների գողության վերաբերյալ ահազանգ չի հնչել։
«Այսուամենայնիվ, հրապարակման հիման վրա ոստիկանները հայտնաբերել են մեքենայի տիրոջը։ Վերջինս իր վրդովմունքն է հայտնել մեքենան լուսանկարելու և լուսանկարը սոցցանցում հրապարակելու կապակցությամբ։ Նա հայտնել է նաև, որ անիվները չեն գողացել. ինքն է հանել վերանորոգելու համար», - նշվում է տարածած հաղորդագրությունում։
Ոստիկանությունը այդ օգտատիրոջը և առհասարակ բոլորին հորդորում է զարկ չտալ երևակայությանը, զերծ մնալ իրականության հետ որևէ աղերս չունեցող հրապարակումներ և մտացածին եզրահանգումներ անելուց։-0-
