Երևանում 36–ամյա խնամակալը բացել էր ննջարանի դուռն ու գողացել 700 հազ. դրամի ոսկեղեն և գումար (ՎԻԴԵՈ)
13:19
15 Ապրիլի 2021
ԵՐԵՎԱՆ, 15 ապրիլի./Նովոստի–Արմենիա/. Ապրիլի 9-ին ոստիկանություն էր զանգել Մառի փողոցի բնակիչ մի կին և հայտնել, որ տնից անհետացել են ծրարով փողն ու ոսկեղենը, հայտնում է ՀՀ ոստիկանության մամուլի ծառայությունը:
Ոստիկանության Նոր Նորքի բաժնի օպերատիվ խումբը մեկնեց դեպքի վայր: Կնոջից ընդունվեց հաղորդում: Նա հայտնեց, որ ինքը երկու օր տանը չի եղել, իսկ այդ օրը նկատել է, որ ննջարանի պահարանից բացակայում են ծրարում պահված 700 հազար դրամի ոսկյա զարդերն ու 35 հազար դրամը: Կինը նաև հավելեց, որ իր բացակայության ընթացքում տանն են եղել իր երեխան ու նրա 36-ամյա խնամակալը:
Ոստիկաններն ուսումնասիրեցին բնակարանը, մուտքի ու ներսենյակային դռները: Ամեն բան կարգին էր: Անվնաս էր նաև ննջասենյակի դռան կողպեքը. տանտիրուհին, զգուշավորությունից ելնելով, իր բացակայության ընթացքում փակ էր պահում ննջարանի դուռը:
Խնամակալը, բնականաբար, դարձավ կասկածյալ: Նա հրավիրվեց ոստիկանության Նոր Նորքի բաժին, որտեղ կտրականապես ժխտեց իր մասնակցությունը ծրարի անհետացման գործին:
Նոր Նորքի քրեական հետախույզները վարկածը ստուգելու իրենց մեխանիզմն ունեին: Օպերատիվ աշխատանքի արդյունքում նրանք պարզեցին, որ խնամակալ կինը վերջերս ոսկեղեն էր գրավադրել, որն, ի դեպ, գնահատվել է մոտ 700 հազար դրամ: Նման պատահականություններ սովորաբար չեն լինում:
Արդեն երեկոյան ժամը ութն էր, երբ խնամակալուհին կրկին հրավիրվեց ոստիկանության բաժին: Փաստերի ճնշման տակ և բացատրական աշխատանքի արդյունքում նա խոստովանեց, որ հարմարեցված բանալիով ինքն է բացել ննջարանի դուռն ու գողացել ծրարը:
