ԵՐԵՎԱՆ, 31 հոկտեմբերի. /Նովոստի-Արմենիա/. ԱՄՆ-ն հաստատել է, որ ՅՈՒՆԵՍԿՕ-ում Պաղեստինի ընդգրկումը կբարդացնի ամերիկյան աջակցության ցուցաբերումն այդ կազմակերպությանը, բայց իրենք, միևնույն է, նրան օգնելու հնարավորություններ կփնտրեն, հաղորդում է ՌԻԱ Նովոստիի թղթակիցը:
ՅՈՒՆԵՍԿՕ-ի գերագույն կոնֆերանսը երկուշաբթի կողմ է քվեարկել Պաղոստինի անդամակցությանը: ՅՈՒՆԵՍԿՕ-ում Պաղեստինի ընդունման մասին պաշտոնապես հայտարարել է Գերագույն համաժողովի նախագահ Կաթալին Բոջիայը: Բանաձևին կողմ են հանդես եկել 107 երկրներ, դեմ են քվեարկել 14-ը: Պատվիրակների մեծամասնությունն այս որոշումը ծափողջյուններով է ընդունել:
Ավելի վաղ ԱՄՆ-ն արդեն հայտարարել էր, որ Պաղեստինի անդամակցումը ՅՈՒՆԵՍԿՕ-ին սպառնում է ֆինանսավորման դադարեցմամբ (ամերիկյան միջոցները կազմում են կազմակերպության բյուջեի 22 տոկոսը): Քվեարկությունից ոչ շատ առաջ նաև Իսրայելն է հայտարարել, որ կդադարեցնի ՅՈՒՆԵՍԿՕ-ի ֆինանսավորումը Պաղեստինի ընդունման դեպքում:
«Այն, ինչ տեղի ունեցավ այսօր, բարդացնում է ՅՈՒՆԵՍԿՕ-ին մեր կողմից ցուցաբերվող օժանդակությունը: Գոյություն ունեին պաղեստինցի ժողովրդին աջակցելու այլ հնարավորություններ: Պետք չէ ժամանակից շուտ ընդունել Պաղեստինը ՅՈՒՆԵՍԿՕ-ի շարքերը»,- հայտարարել է ԱՄՆ-ի ներկայացուցիչը՝ հանդես գալով կազմակերպության կենտրոնակայանում տեղի ունեցած քվեարկությունից հետո: -0-
