2009 թվականին մահացած «փոփ երաժշտության արքա» Մայքլ Ջեքսոնի անձնական բժիշկ Քոնրադ Մյուրեյի գործը քննող Լոս Անջելեսի դատարանը երկուշաբթի լսել է Ջեքսոնի անձնական խոհարարի վկայությունները և պարզել նրա սննդային նախասիրությունները:
Մայքլ Ջեքսոնը մահացել է 2009 թվականի հունիսի 25-ին` կյանքի 51-րդ տարում: Քննության վարկածով, երգչի Ջեքսոնի բժիշկը՝ Մյուրեյը, երգչին ուժեղ քնաբերի` պրոպոֆոլի չափազանց մեծ չափաբաժին է տվել, որն այլ դեղամիջոցների, այդ թվում` հանգստացնող դեղորայքի հետ փոխազդեցության արդյունքում երգչի մահվան պատճառ է դարձել: Բժիշկի փաստաբանն իր հերթին պնդում է, որ երգիչն ինքն է իրեն դեղամիջոցը ներարկել, մինչ Մյուրեյը մյուս սենյակում է գտնվել:
«Սովորաբար նրա նախաճաշը բաղկացած է եղել գրանոլայից (վարսակի, դարչնագույն շաքարի, կոկոսի և ընկույզի խառնուրդ) նշի կաթով, բազուկի կամ գազարի հյութով: Երբեմն նա նախաճաշում էր ձվածեղով, սպանախ կամ ինչ-որ մի բան՝ մեծ քանակի բանջարեղենով»,- հեռուստաալիքը մեջբերում է Քեյ Չեյզի (Kai Chase) ցուցմունքները, ով կերակուր էր պատրաստում երգչի և նրա երեք երեխաների համար:
Չեյզը պատմել է նաև, որ մահվանից առաջ վերջին ամիսներին Ջեքսոնը հազվադեպ էր ներքև իջնում նախաճաշելու: Դրա փոխարեն Մյուրեյն ինքն է սկսել նրան նախաճաշ բերել սենյակ:
Ջեքսոնի մահվան օրը Չեյզը նրա համար պատրաստել է գրանոլա նշի կաթով և նրա սիրած հյութերից մեկը: Միաժամանակ Չեյզը նկատել է, որ նախօրեին սպիտակ լոբուց եփած ապուրը, որով, ըստ նրա, պետք է ընթրեր Ջեքսոնը փորձերից հետո, մնացել է սառնարանում:
Այն դեպքում, եթե դատարանը մեղավոր ճանաչի Մյուրեյին, ով չի հերքում այն փաստը, թե Ջեքսոնին պրոպոֆոլի ոչ մեծ չափաբաժին է տվել, բայց իրեն առանց դիտավորության մահվան մեջ մեղավոր չի ճանաչում, նա կարող է դատապարտվել չորս տարի ազատազրկման և զրկվել բժշկական գործունեության արտոնագրից: -0-
